তোৰ পদুলিত লতা-গোলাপে মেলিছে পাহি সোনপাহি

©Admin
0
দেখিছনে………দেখিছনে তই ?
বসন্তৰ বতৰা লৈ তোৰ পদুলিৰ
লতা-গোলাপ জোপাই আজি
থুপা-থুপে  মেলিছে পাহি ৷

দেখিছনে তই ৷
নিমজ সুকোমল পাহিবোৰে 
হালি-জালি আবেলি আবেলি
ফাগুনৰ সতে মাৰিছে চুপতি!
শুনিছনে কি কথা পাতিছে 
গোপনে গোপনে সিঁহতে আজি ?

ক'ৰ জানো এজাক অচিন পখিলী
ঘনে ঘনে আহে-যায়
মনে মনে দি যায় কিহৰ বাতৰি
পাৱনে তই কিবা তাৰ উৱাহদি?

ফাগুনে বসন্ত মাতিছে,
নিশা পৰে পৰে ফেঁচাই কান্দিছে;
তোৰ বুকুত প্ৰেমৰ পচোৱা বলিছে,
তোৰ পদুলিৰ লতা-গোলাপ জোপাই
থুপা-থুপে পাহি মেলি
দিছে যেন তাৰেই বতৰি।

বতাহত হালি-জালি আবেলি আবেলি
পচোৱা সতে সিহঁতে ছাগে
তোৰ কথাকে পাতিছে কিজানি!

সোনপাহি ৷
তোৰ মন আকাশৰ নিচুক কথাটি
কিমানো আৰু গোপেনে ৰাখিবি ?
তোৰ পদুলিত লতা-গোলাপে 
মেলিছে মৰমৰ পাহি ।

📝প্ৰবিন দত্ত


                                                  

Post a Comment

0Comments

নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ

Post a Comment (0)