নিৰ্লিপ্ত

সৰাপাত বিৰহ!

শুকান মৰ-মৰিয়া

আহ্লাদিত গ্লানিয়েই সৰৱ।

শুহি থকা তেজত চেকা।

ধৰ্ষণ হয় কত বিভ্ৰান্তৰ

লঠঙা কাননৰ বিলাপ।

এই চেলাউৰিত যিটোপাল তেজ

তেজ-মঙহৰ উকা দেহোও ম্লান পৰে;

নিৰ্বিকাৰে দাহ্য,

সেয়ে নিৰ্লিপ্ত।

কত এজাৰ-বিজাৰ বসন্ত,

কত নিৰস এলদোৰাড'

কত ফৰাচী ৰমণীৰ বুকুত আইফেল টাৱাৰ;

সকলো আচহুৱা...!

সাউত কৈ ভটিয়নীৰ খোজত লিংডৌ,

তেজপিয়া বাসনাত চকুৰ বেশ্যা;

আহ্; বাসনা পোহে তাহাঁতে বীৰচক্ৰৰ লকেটত বলীয়ান হৈ,

নিৰ্লিপ্ত অভিলিপ্সা।

সৌ সিদিনা সেউতীৰ গামোচাত দাগৰ কাতৰ!

চেলেকা-চুবিয়া সূতাৰ সৈতে প্ৰতিৰক্ষাৰ আখৰ,

কামনা পালে তেওঁলোকে সত্বাৰ বিপৰীতে বাসনাৰ।

নিৰ্লিপ্ত সংগোপনৰ অভিসাৰ চলে,

বুকু উদং, তৃষাত ভ্ৰম;

না-নাৰী, না-জী,

সকলো মাথো চাহিদাৰ লিগিৰী।

🖋️নচিকেতা(হোমেন গগৈ)

ধুনীয়াপথাৰ,সাপেখাতী, চৰাইদেউ