সেউজীযা প্রোথিত কৰি
কৃষক ঘৰমুৱা হ'ল |
এতিয়া কেৱল
অপাৰ সেউজীয়া
চকু আৰু মনৰ
ভাগৰ পলোৱা হাঁহিত
কৃষকে আৰামৰ
ঘুমতি যায় |
শাওনীয়া ঘামৰ
লুণীয়া সোৱাদ
শুকাব যেতিয়া
তেতিয়া ধানফুলে হাঁহিব |
চোতালৰ কেঞাবন চিকুনাই
গৃহিনীয়ে গোৱৰ পানীৰে ধুব
কঙালী বিহুৰ চাকিগছি
এইবাৰ ডাঙৰকৈ জ্বলিব
অপকাৰী চগাবোৰ
জুইত জাহ গলে
কৃষকৰ হাতখন পোন হ'ব |
এতিয়া অপাৰ সেউজীয়া
সেউজীয়াৰ ওপৰেৰে বলা
বগা বতাহজাক
বলি আবেলি বলি আছে |
বা চাতি লাগি
কৃষকৰ কিছু ভাগৰ কমিছে
📝হেমেন হাজৰিকা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ