ওচৰতে ৰৈ থকা মানুহ এজনক ১২ নম্বৰ ৰূমটো কোনফালে আছে সোধি বিচাৰি পালে মাধুৰী ভৰ্তি হৈ থকা ৰূমটো। মাধুৰীৰ মাকক দেখাৰ লগে লগে হিমাই কান্দি কান্দি সোধিলে - "মা , মাধুৰীৰ কি হৈছে ? তাইৰ লগত সেইদিনা কথা পাতোতেও বৰ মন মাৰি আছিল । হঠাৎ তাইৰ কি হ'ল মা..."
মই একো নাজানো হিমা।তাইৰ বোলে বহুত ডাঙৰ বেমাৰ হৈছে । ডাক্তৰে এতিয়ালৈ একো কোৱা নাই।অলপ পিছতে গম পাম। কথাটো কোৱাৰ লগে লগে মাধুৰীৰ মাকে হুকহুকাই কান্দিবলৈ ধৰিলে । হিমাই সান্তনা দিছে মাকক - "মা আপুনি ধৈৰ্য ধৰক । তাইৰ একো নহয় মা।"
হিমা তুমিতো তাইৰ লগত পাঁচবছৰ একেলগে অতিবাহিত কৰিলা । তুমি তাইক বুজি পোৱা । তাই তোমাক কিবা কৈছিল নেকি ?
কথাটো শুনাৰ পাছত হিমাৰ বহুত কথাই মনত পৰি গ'ল।তাই সকলো কথাই কৈছিল তাইক। কেতিয়াবা তাই কথাবোৰ কৈ বহুত কান্দে। কেতিয়াবা তাইক কান্দোনৰ পৰা ৰখাব নোৱাৰে । দুদিন আগত তাইক যিটো কথা ক'লে সেই কথাটো শুনাৰ পাছত তাই কল্পনাও কৰা নাছিল । ইমান হাঁহি থকা ছোৱালী এজনীৰো যে ইমান দুখ বুকুৰ মাজত সোমাই থাকিব পাৰে ।
কথাবোৰ ভাবি ভাবি তাইৰ দুচকুৰে চকুলো বাগৰি আহিল । মাধুৰীৰ মাকৰ মাতত তাই গম পালে , তাই যে ভাবি আছিল কথাবোৰ।
কি হ'ল হিমা তুমি একো নক'লা যে । তাই তোমাক কিবা কৈছিল নেকি। "মা তাই মোক সকলো কথাই কৈছিল কিন্তু তাইৰ বেমাৰৰ কথা এদিনো কোৱা নাছিল। মাথোঁ তাই কেতিয়াবা অকলে কৰবালৈ যায় । সোধিলেও নকয় তাই । মা তাইৰ সঁচাকৈ কিবা ডাঙৰ বেমাৰ হৈছে নেকি ?" হিমা তাই মোক একো নকয় । সদায় হাঁহি হাঁহি থাকে । খালি কেতিয়াবা বহুত কান্দে । সোধিলে কয় মই সদায় তোমাৰ লগতে থাকিম মা।
ইতিমধ্যে ডাক্তৰ ওলাই আহিল। ডাক্তৰৰ মুখৰ পৰা কথাটো শুনি দুয়োগৰাকী কান্দোনত ভাগি পৰিল।
তাই কি সঁচাকৈ হেৰাই গ'ল ? বহুত দূৰত কোনেও বিচাৰি নোপোৱাকৈ।তাই সদায় কয় মই হেৰাই যাম। অকলশৰে গুচি যাম এদিন। আজি তাই গুচি গ'ল সপোনবোৰৰ সৈতে আধৰুৱা হৈ । তাই আৰু কেতিয়াও নকয় মই হেৰাই যাম বুলি।
✍🏻দিপশিখা ৰাজকোঁৱৰ
একাদশ শ্ৰেণী।
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ