বসন্ত উৎসৱ-ৰুমী কলিতা দত্ত

বসন্ত নামে কুঁহিপাতে পাতে

প্ৰাণৰো প্ৰাণৰ 

চহা কৃষকৰ উৰ্বৰা ভূমিত সিঁচি এমুঠি সৃষ্টিৰ বীজ ।

বৰদৈচিলাৰ এজাক চেঁচা বৰষুণে

দেহাটি শিৰশিৰাই পিৰপিৰাই 

বসন্তৰ সুবাস বিলায় ।

কুলিটিৰ সুৰে সুৰে বসন্তৰ বতৰা 

দুহাত জেতুকা বুলোৱা বৰ্হমথুৰিৰে দুটি ওঁঠ কঁপোৱা 

অ' মোৰ বসন্তৰ বলীয়া-বা ।

যৌৱন ঘূৰাই পাওঁ তোৰ লিহিৰী পৰশত 

শুকুলা কপৌপাহেৰে খোপাটি সজাই হ'ব খোজো মই বহাগৰ নাচনী ।

তোৰ সেউজবুলীয়া হাঁহিবোৰ, 

নীলিম বুকুৱেদি সাতোৰঙী ৰামধেনু

জাগি উঠে প্ৰণয়ৰ মধু গুঞ্জন ।

জেতুকা বুলীয়া হাঁহি লাহী-পাহি নাচনীজনীৰ  সুকোমল ওঁঠত

উত্ৰাৱল হৃদয় ।

কৃষ্টি সংস্কৃতিৰ ভেটি টনকিয়াল কৰি 

যৌৱন-যুৰীয়া বতাহজাকে 

সৃষ্টিৰ পাতনি মেলে ।

প্ৰকৃতি শস্য সম্ভৱা,

জেতুকা পাতৰ দৰে 

বৰদৈচিলাৰ ৰিমঝিম ঝংকাৰ 

যেন ইন্দ্ৰৰ নন্দন কানন পুষ্পৰ সমাহাৰ

মেঘৰ মাদলৰ সুৰে সুৰে সপোনৰ ফেহুঁজালি।

🖋️ৰুমী কলিতা দত্ত 

২নং কেনুগুৰি ,টিংখং

পোঃঅঃ-ধমন জিলা-ডিব্ৰুগড়