ব'হাগ বিহুত হুচৰী গোৱা এটা পৰম্পৰা আছে | গৰুৰ বিহুৰ গধূলিৰ পৰা হুচঁৰী গোৱা আৰম্ভ হয় | ব'হাগ বিহুৰ আটাইতকৈ আকৰ্ষণীয় আৰু উল্লেখযোগ্য বৈশিষ্ট হ'ল হুঁচৰী গোৱা | লোক সংস্কৃতিৰ গৱেষক সকলৰ মতে আগতে ব'হাগ বিহুৰ সময়ত ৰাজ আলিয়েদি হুঁচৰী গাই যোৱাৰ প্ৰথা প্ৰবৰ্তিত আছিল | গৃহস্থই সপৰিয়ালে আলিবাটলৈ ওলাই গৈ মাননি শৰাই দি হুঁচৰীৰ আৰ্শীবাদ গ্ৰহণ কৰিছিল |
হুঁচৰী এ দলৌ চৰাই
তামোল থোকা পাণ গুছি
ৰূপৰ শৰাই |
পিছত ত্ৰয়োদশ শতিকাত আহোম ৰাজতন্ত্ৰৰ দিনত স্বৰ্গদেউ আৰু ডা-ডাঙৰীয়া সকলৰ অনুগ্ৰহ লাভৰ অৰ্থে তেওঁ বিলাকক সন্তুষিত কৰি ৰাখিবলৈ তেওঁলোকৰ চোতালত গৈ হুঁচৰী গোৱাৰ প্ৰথা প্ৰবৰ্তিত হয় |
দেউতাৰ পদূলিত গোন্ধাইছে মাধুৰী
কেতেকী মলেমলাই ঐ
গোবিন্দাই ৰাম |
সেই তেতিয়াৰ পৰাই বিহুৱা সকলে উজনি নামনি মাৰি কেওখনি দেউতাৰ পদূলিত মাধুৰী গোন্ধোৱা, কেতেকী মলমলোৱা , স্বৰ্গদেউ বাটচৰাৰ মুখলৈ ওলোৱাৰ ক্ষণ গণি থকা হ'ল |
আমাৰ হুঁচৰীৰ লেখিয়াকৈ মিচিং সম্প্ৰদায়ৰ ডেকা-গাভৰু সকলেও ফাগুণ মাহৰ পহিলা বুধবাৰৰ দিনা আলি আই লৃগাং উচবত ঢোল পেঁপা গগনা বজাই জুম বান্ধি গৃহস্থৰ ঘৰে ঘৰে গোমৰাগ নাচ নাচে | বড়ো জনগোষ্ঠীৰ ডেকা গাভৰু সকলেও ব'হাগৰ দ্বিতীয় দিনা লোক বাদ্য বজাই দল বান্ধি আনন্দমনে গীত নৃত্য পৰিবেশন কৰাৰ নিয়ম পূৰ্বৰে পৰা চলি আহিছে | অসমৰ আদিবাসী তিৱা ( লালুং) জনগোষ্ঠীৰ লোক সকলেও ব'হাগৰ বিহুত ঘৰে ঘৰে গৈ গৃহস্থক আৰ্শীবাদ দি দলবদ্ধ ভাবে এনে নৃত্যগীত অনুষ্ঠান পৰিবেশন কৰাৰ ৰীতি চলি আহিছে | তেওঁলোকে এই নৃত্য গীতৰ অনুষ্ঠানক বোকানাচ বোলে |
ৰীতি বৈশিষ্টৰ ফালৰ পৰা হঁচৰীৰ ঘাই অংশ দুটা | পোনতে হুঁচৰী কীৰ্তন আৰু তাৰ পিছত বিহু নাম | হুঁচৰী সাধাৰণতে ল'ৰা, ডেকা বুঢ়া সকলোৱে মিলি গায় | গাভৰুৰ তাত স্থান নাই | বয়সস্থ সকলে চোলা চুৰিয়াৰ উপৰিও গাত বৰকাপোৰ বা চেলেং মেৰিয়াই লয় | মুৰত পাগুৰী মাৰে |
শ্ৰীমন্ত শংকৰদেৱে অসমত বৈষ্ণৱ ধৰ্ম প্ৰৱৰ্তন কৰাৰ লগে লগে কীৰ্তন আৰু মাধৱদেৱৰ নামঘোষা পুথিৰ পদ-পয়াৰৰ প্ৰভাৱে হুঁচৰীৰ অনুষ্ঠানক আধ্যাত্মিক অনুষ্ঠানলৈ উত্তৰণ ঘটাই |
প্ৰথমতে হৰি ধ্বনি উছৱ কৰি বা গৃহস্থৰ কুশল কামনা সুচক আৰ্শীবাদ দি ঢোলত চাপৰ মাৰি হুঁচৰী আৰম্ভ কৰি দি পদ জোৰা হয় |
ৰাধাই বোলে কানাই আমাক পাৰ কৰা
এৰি যমুনাৰে জল হৈ গোবিন্দাই ৰাম |
কৃষ্ণৰ মূৰতে বকুল ফুল এপাহি
নিয়ৰ পাই মুকলি হ'ল ঐ গোবিন্দাই ৰাম ||
হুঁচৰী গাওতে ধুনীয়াকৈ ঘেৰ পাতি গোৱা হয় | ডিঙি ফালি ফালি ৰাগ টনা হয় |
আমি যে হুঁচৰী গাঁও ঘুৰি ঘুৰি
খুচৰি খুচৰি খাম
ডিঙি ফালি ফালি ৰাগকে টানিছোঁ
জানো ৰূপ একুৰি পাম |
হুঁচৰী শব্দৰ মূল হুঁচাৰী | হুঁ মানে চিঞৰা , ছা মানে আৰ্শীবাদ দিয়া আৰু ৰি মানে উত্তেজিত হোৱা | হুঁচৰী মানে আনন্দত উত্তেজিত হৈ চিঞৰি চিঞৰি কুশল মংগল কামনা কৰা | হুঁচৰী নিজে আহিলে কথাই নাই গৃহস্থই ঘৰলৈ মাতি আনিও হুঁচৰী গোৱায় | গুৰু ভকতক দান কৰে | নমৰা কালতে গোবিন্দাই ৰাম বুলি তাৰমানে হৰিৰ নান যশ শ্ৰৱণ কীৰ্তন কৰি পৰলোকৰ পূণ্য সঞ্চয় কৰে |
গুৰুকো কৰিবা দান মোৰ দেউতা
ভকতক কৰিবা দান |
নমৰা কালতে অ'ৰাম বুলিবা
তেহে পাবা বৈকুণ্ঠ থান |
🖋️হেমেন হাজৰিকা
মিৰ্জা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ