সিদিনা ৰ'দে কান্দিছিল-অনুপম কলিতা

                                 

( ১ )

ভোক জ্বৰত কঁপা তাৰ জুহালে দিয়ে

শইচবোৰ কঙাল হোৱাৰ খবৰ....

উশাহে বিনোৱা চোতালত পৰি

বালিমাহীয়েও কৈ যায় ,

"গামোচাখন উলিয়ায় ল ,

এইবাৰো পাৰ হ'ব অনেক উজাগৰী ৰাতি ..!"

(   ২ )

সেইবোৰ অতীত আছিল,যেতিয়া

জীৱনৰ বতৰা লৈ

বতাহে তাঁতবাতি কৰিছিল ,

জীয়াসুঁতিৰ দৰিকণা এটি হৈ ।

( ৩ )

মৰিশালিৰ গীতে 

আমনি কৰা তাৰ পদূলিত

সপোন সৰাৰ কাহিনী বৰ দীঘলীয়া ।

( এইবুলি দুৱৰিয়ে ক'লে )

( ৪ )

দৰিদ্ৰতাৰ ক'লা ছালখন দেখি ,

কোনোবা অচিনাজনৰ 

হাতৰ তলুৱাত লুকাই ;

সিদিনা ৰ'দে কান্দিছিল  ....

( সেই কথা পিছে এতিয়াও লিখা নহ'ল )

✍️অনুপম কলিতা

পাভজান গাঁও,গোলাঘাট।