পানীৰ শিকলিত বন্দী-কবিতা~মীনা পামে গাম

আমিবােৰ বন্দী ।
পানীৰ শিকলিৰে
হাত ভৰি বন্ধা আমাৰ ॥

লৌহ কঠােৰ শিকলি
আমাৰ নাই ।

শক্তিশালী পানীৰ 
শিকলিত বন্দী 
ওৰেতো জীৱন আমাৰ ॥

পানীতে জীও
পানীতে মৰোঁ
পানীতে খেলোঁ
পানীৰেই আমাৰ জীৱন 
বাহঃ বাহঃ বাহঃ ॥

পানীৰ দেশ।
মাটিবােৰ দুৰ্বল।
মাটিৰ নিজা অধিকাৰ নাই,
পানীৰ নিৰ্দ্দেশতহে মাটিবােৰ চলে 
হাঃ হাঃ হাঃ ॥

সৌ যে দেখিছা
অটব্য অৰণ্যখন,
আৰু দেখিছা
ধাননিখন !!
ধানৰ থোকবোৰে
পানীৰ কথামতেহে
উঠা বহা কৰে ।

ধান পানীয়ে নাখালেহে
মানুহে খাব পাৰে ।
পানীৰ শক্তিৰে ঘেৰা
তোমাৰ দেশ,
পাহাৰ পৰ্ব্বত নিবিচাৰিবা ॥

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send