ঋতুৰাজ | মধুকৃষ্ণা দেউৰী শিলপনীয়া

ফাগুনৰ পছোৱাই তোমাৰ আগমনৰ বতৰা আনিব,

গছে গছে ন-কুঁহিপাতে তোমাকেই আদৰিব।

কপৌ-কেতেকী,চম্পা-তগৰ,বকুল আদি গোন্ধই যিমানেই আমোল-মোলাই উঠিব 

তোমালৈ হেঁপাহ দুগুণে বাঢ়িব।

শিমলু ,পলাশ, মদাৰৰ ৰঙা পাহিয়ে যিমানেই ধৰাৰ 

বুকু ৰাঙলী কৰি তুলিব

তোমালৈ মনত সিমানেই পৰিব।

নানা চৰাই গছৰ ডালত পৰি

গীত জুৰিব

কুলি-কেতেকীৰ মৌ-মিঠা মাতে মন পুলকিত কৰিব।

 ন-পানী পাই মাছবোৰে আনন্দত যিদৰে উজাবলৈ ধৰিব

তোমাৰ মোৰ মৰমবোৰ সেইদৰে বাঢ়িব।

প্ৰকৃতিৰ শোভা বিৰাজ ছয় ঋতুৰ তুমিয়েই বসন্ত,

সেয়ে "ঋতুৰাজ" তোমাৰেই আন নাম।