পঁজাবোৰৰ উৰুখা ছাল নাইকিয়া হ'ল
বগীতামৰ চিকমিকনি
ভ্ৰাম্যভাষ, দূৰদৰ্শনৰ সণ্ঢালনিয়ে
দ্ৰুতভাৱে
গঞা ৰাইজক নতুন সপোন দেখুৱালে !
সাতামপুৰুষীয়া মৰম-চেনেহৰ ডোলডালতো
যেন ঘূণে ধৰিলে !
দ' পথাৰত ভূঁই ৰোৱা ছোৱালীজাকৰ
ঔ-ফুলীয়া হাঁহি ক'ত হেৰাল !
কেঁকোৰা-নাঙলৰ সীৰলুত সপোন সিঁচা পাহুৱাল ডেকাহঁতৰ
সৰিয়হ ফুল বৰণীয়া উৎসাহো ঢুকাল !
পুঠি-খলিহণাৰে এমুঠি
উদৰ পূৰাই
তামোলৰ সেলেঙি বোৱাই
বাই-চাইকেলত শাক-পাত বোজাই
বুধবৰীয়া হাটলৈ যোৱা
সৰু দাইটি, কণল'ৰাৰ চিন-মোকাম নোহোৱা হ'ল !
বৰনামঘৰৰ তিথি-পৰৱ বুলি
মাহেক-পষেকৰ আগৰ পৰা
হাউচ কৰি পিঠা-পনাৰ যোগাৰ কৰা
খুড়ী, বৰমাহঁতৰ মনবোৰো সেঙেটা পৰিল !
আগলি পথাৰত টেঙাবল খেলা
কিশোৰ জাকো নোহোৱা হ'ল
পদুমণি বিলত জাকৈ বাবলৈ যোৱা
সোণপাহীহঁতৰ
দেখাদেখি নাইকিয়া হ'ল !
কৰ্তব্যৰ তাগিদাত
দূৰণিত থাকি
মনৰ জপাত সাঁচি সামৰি ৰখা
তাহানিৰ সেই সোণসেৰীয়া দিনবোৰ
প্ৰাণৰ আপোন গাওঁখনৰ
গঞা-জ্ঞাতিৰ সন্ধানত
মই হাবাথুৰি খালো !
কিবা এক ৰিঙা ৰিঙা ভাৱে
মোক বিহ্বল কৰি তুলিলে !
✍️ ড° আৰাধনা বৰুৱা
যোৰহাট
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ