কলংকিনী ৰাধে-মাৰ্জিনা বেগম

অনিন্দ্য সুন্দৰী গোৱালৰ জী

ভাৰ তুলি যমুনা ঘাটত ,

দধি-দুগ্ধ লৈ যায় মথুৰা হাটলৈ 

সোণ বিকি ভগা নাওত।

যমুনাৰ পাৰত নাৱৰীয়া  কানাই 

যৌৱন চঞ্চলা চাৱনিৰে ,

হৃদয় শাৰীত থিয় হৈ হৰি নিলে 

মন বোলোৱা পিৰিতিৰ কথাৰে।

মোহন বাঁহীৰ সপ্ত সুৰৰ বিন্ধাত

কৃষ্ণময়ী বৰষে অধৰামৃত ,

বেণুগীত শুনি বাউলী হৈ  ৰাধে 

ঢাপলি মেলে কদম্ব তলত।

গোপন প্ৰেমৰ কৃষ্ণ-লীলা জানি 

গকুলত হাঁহিছে গোপিনী,

উতনুৱা মনৰ প্ৰণয়ৰ  তাৰণাত 

নাযাওঁ কৈও থাকিব নোৱাৰি।

ললিত লয়ত অন্তৰত সঞ্চিত 

প্ৰগাঢ় প্ৰেমৰ বোৱঁতী ধাৰা,

গোপন অভিসাৰ জগতে জানিলে  

নাম পালে  "কলংকিনী ৰাধা"।

◾মাৰ্জিনা বেগম, বৰপেটা