স্মৃতি -পূজা গোহাঁই

আলসুৱা স্মৃতি

পুনৰ এবাৰ তোমাক চুই চাবলৈ দিয়া

মোৰ তৃষিত পৰাণ জুৰাই

এবাৰ দুচকুৰে বুলাব দিয়া

তোমাৰ উৰ্বৰা শৰীৰ

যত নাই মোৰ বাবে এতিয়া

নতুনত্বৰ ৰং ।

মুঠি মুঠি আবীৰ ছটিয়াই 

তুমি মোক দিছিলা

জীৱনৰ দুৰ্বাৰ প্ৰেৰণা

জীবনৰ ৰং বুটলিবলৈ

তোমাৰ ছাঁয়াতে এদিন সজাঁল ধৰিছিল

মোৰ হেৰুৱা দিনৰ কাহিনী ।

এতিয়া সেইবোৰ সেউজীয়াৰ পৰা

হালধীয়া হল

তোমাৰ উভতনি যাত্ৰাত 

মই হব নোৱাৰিলো

তোমাৰ সহযাত্ৰী ।

মোক এৰি গলা সোঁৱৰনীৰ পাতত

অচিন অতিথিৰ দৰে

এতিয়া তুমি থকা ঠাইৰ ছবি চাই চাই

মই হৈ পৰিছো এটা জীবন্ত ফিনিক্স। 

 

✍️পূজা গোহাঁই 

      শিৱসাগৰ