অদৃশ্য আত্মাৰ শুভ কামনা — মাৰ্জিনা বেগম

আন্ধাৰ নিশাৰ বক্ষ ফালি 

তেওঁ উপস্থিত হৈছিল মোৰ 

অচিন চিনাকি এৰি অহা পদূলিত 

লগত লৈ আহিছিল আন্ধাৰ বিধ্বংসী 

 এজোলোঙা পোহৰৰ চাকি।

মোৰ দুৱাৰ মুখত টুকুৰিয়াইছিল তেওঁ 

মই কৈছিলোঁ, " এই বাটে আন্ধাৰ নামে"

তেওঁ কৈছিল,"আন্ধাৰ বাটত মই পোহৰ বিলাও"

সন্মুখৰ দুৱাৰ খুলি গৈছিল আপোনা-আপুনি।

 মোৰ চাৰিওফালে পোহৰ ছটিয়াই 

সানি দিছিল মুঠি মুঠি আবিৰ...

আঙুলিয়াই দিছিল উদয়াচলৰ দিশ ,

ৰ'দৰ বাট নৌপাওঁতেই তেওঁ সুহুৰিয়াইছিল 

-" অদৃশ্য আত্মাৰ শুভ কামনা থাকিল" ।