বন্ধ কোঠাৰ কৰ্মশালা

বন্ধ কোঠাত চলিছে

চৰিত্ৰহীন হোৱাৰ কৰ্মশালা,

আয়োজক-

মানুহৰ মঙহ খোৱা মানুহ ,

প্ৰশিক্ষক-

মুখা পিন্ধা ভদ্ৰলোক,

শিকাৰু-

 সপোন দেখা যৌৱন ৷

মেঘ হাকুটিয়াই আনিব বিচৰা

দেহ মেৰিয়াই আছে

চিগাৰেটৰ পকোৱা ধোৱাই ,

বিলাসী সপোনৰ বৰপেৰা

বন্ধকত আছে অচিনাকি দুবাহুত ৷

পাৰিলে খুলি দিলোহেঁতেন

সুখৰ সপোন দেখা খিৰিকীখন,

পৰা হ’লে উপহাৰ দিলোহেঁতেন

প্ৰহেলিকাৰ আচ্ছাদন গুছাই

জীৱন যুঁজৰ অস্ত্ৰ ৷

ক’তো ব্যৱধান শেষ হয়

বন্ধ কোঠালীত,

ক’তো আৰ্তনাদ থমকি ৰয়

বন্ধ কোঠালীৰ বেৰত ৷

সমৰ্পণ অস্বীকাৰৰ সিপিঠি

সুখ নীৰৱ আৰ্তনাদৰ সংগী ৷

যাৰ যুঁজি জিকাৰ সাহস নাই

সমাজক বুজাৰ অৱকাশ নাই

সুখৰ সংজ্ঞা যাৰ বাবে ধূষৰ,

তেওঁ বন্ধ কোঠাৰ কৰ্মশালাৰ লক্ষ্যহীন শিকাৰু ৷

🖋️ডাঃ প্ৰণৱ চক্ৰৱৰ্তী

কলেজ ৰোড, নলবাৰী