বাট বিচাৰি-প্ৰণৱ চক্ৰৱৰ্ত্তী

বাট বিচাৰি ফুৰাৰ
যিদৰে এটা মাদকতা থাকে
তেনেদৰে থাকে যন্ত্ৰণাও৷
আচলতে
আমি কলৈ যোৱাৰ বাট বিচাৰিছোঁ
তাৰ ওপৰতে জোখমাখ চলে
সুখ আৰু যন্ত্ৰণাৰ৷
প্ৰেয়সীৰ ঘৰৰ ঠিকনা বিচৰাৰ মাদকতা
দেউতা ভৰ্ত্তি হৈ থকা হাস্পতালৰ
কেবিন বিচাৰোতে পোৱা নাযায়,
চাকৰি বিচাৰি অফিচৰ বাট
বিচৰাৰ যন্ত্ৰণা
বিলাস ভ্ৰমণৰ বাট বিচাৰোতে নাই৷
তথাপিও 
বাট বিচাৰি বাটতে থকাৰ সুখ
বাট বিচাৰি অবাটে যোৱাত নাই..

✍️প্ৰণৱ চক্ৰৱৰ্ত্তী
     নলবাৰী,

Post a Comment

Previous Post Next Post