এজাক ন - সপোন পক্ষীয়ে পাখি মেলে,
মহাবিদ্যালয়ৰ উমাল বুকুৰ দুৱাৰে দুৱাৰে
এজাক তৰুণ তৰুণীৰ আগমণে
সপোনৰ চিকমিকনি উঠে ।
ধূসৰ বিৱৰ্ণ ৰুক্ষ বক্ষতো আজি
সোণাৰু জোপা হালধীয়া হৈ ফুলিছে ,
সেউজী ধৰাৰ নীলিম আকাশৰ দৰে
প্ৰতিজন কাকজনীয়ানৰ বুকুত
স্নিগ্ধ হৃদয়ৰ এখনি ছবি হৈ জিলিকি উঠিছে ।
১৯৬৭ চনত জন্ম ল'লা তুমি
জ্ঞানৰ আলোক সিঁচৰতি কৰি আজি
ভৰি দিলা ৫৫ বৰ্ষৰ ভূমিত।
প্ৰজ্ঞাৰ ৰঙেৰে ৰঙীন কৰিলা
শত জন জীৱনৰ ছবি;
প্ৰসুপ্তজনক জাগ্রত কৰি
কৰিলা মহীয়ান ।
জ্ঞানৰ জ্যোতিৰে সকলোকে
কৰিলা জ্যোতিষ্মান ।
ৰৌদ্ৰজ্বল পুৱাত এজাক পক্ষীৰ গুণ-গুণণিত
সাৰ পাই উঠা একুঁকি হাঁহি
কাকজান মহাবিদ্যালয় খনি ।
পুথিভঁৰাল আৰু কেন্টিনখন
মহাবিদ্যালয়ৰ অন্যতম থলী ।
ন- পুৰণি কিতাপৰ সুগন্ধিৰ সৈতে
কেন্টিনৰ আড্ডাবোৰ
এৰাব নোৱাৰা অন্য এক ৰাগী ।
মহাবিদ্যালয়ৰ বাটচৰাতে
কৃষ্ণচৰাৰ প্ৰণচঞ্চলা হাঁহিত
প্ৰাণ পাই উঠে মহাবিদ্যালয়ৰ প্ৰতিটো কোঠৰী ।
কাকজানৰ প্ৰাংঙ্গনত অধ্যক্ষা বাইদেউ এজোপা বটবৃক্ষ ;
প্ৰতিজন কাকজনীয়ান তাৰে যেন পত্ৰ - পুষ্প ।
প্ৰতিটো বিভাগে বহন কৰে এক বিশেষ সাক্ষ্য ।
প্ৰতিজন জ্ঞান দাতাই বিশেষ ভূমিকা পালন কৰে
শিক্ষাৰ্থীৰ জীৱনত ।
বহু আহে, বহু যায়
ইতিহাসৰ পাত গধুৰ কৰি
স্মৃতিৰ মণিকোঠা সোঁৱৰাই।
নানা ভাষা-কৃষ্টিৰ সমাহাৰে জ্ঞানৰ বেদীত
হাজাৰ জনে জীৱন গঢ়িছে আহি ।
বিদ্যাৰ অন্য এক পৰিধি তুমি
বিলাই দিলা কাকজান বাসীক
সঞ্জীৱনী জ্ঞান ।
অজ্ঞানতাৰ আৱৰণ গুচাই
মিছা প্ৰহেলিকাক দূৰলৈ দলিয়াই
সকলোকে দিলা তুমি
জ্ঞান আলোকৰ সন্ধান ।
৫৫ বছৰীয়া গৌৰৱোজ্জ্বল যাত্ৰাৰ সাফল্যৰ ৰেঙনি,
কাকজান মহাবিদ্যালয় খনি ।
জিলিকি থাকা তুমি
উজ্বলি উঠা তুমি
স্ৰোতস্বিনী হৈ অবিৰাম বৈ যোৱা
সহস্ৰ গুণেৰে তুমি বিভূষিত হৈ ৰোৱা ।
জীৱনৰ শেষ দিনটোলৈকে
তোমাৰ বন্তিগছিতে উজাৰিম খৰিকা ডালি,
সপোন পৃষ্ঠাত সম্পাদনা কৰিম
তোমাৰে প্ৰতিটো কাহিনী ।।
◾শিৱানী বৰুৱা
অসমীয়া বিভাগ , প্ৰথম ষান্মাসিক
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ