জন্মেজয়ে এইবাৰ ওচৰৰ গৌতম চলিহাক দেখি চাহ বাগান এখন কৰাৰ মন মেলিল ৷ অসমীয়াত এটা প্ৰৱাদ আছে --"দেখাক দেখি কুকুৰে মানে একাদশী ৷" কথামতেই কাম ওচৰৰ গাওঁখনত বাস কৰা আদিবাসী লোকসকলক মাতি আনি বাৰীৰ বাঁহ,টকৌ গছ,তামোল গছ এমূৰৰ পৰা তহিলং কৰি কাটিৱলৈ ঠিকা লগাই দিলে ৷ বাৰীৰ সাত-আঠ বিঘা জুৰি থকা
তামোলনী বাগিছাখনৰ প্ৰায় ছয় বিঘা মান প্ৰায় কাটি শেষ হবৰে হৈছেগৈ ৷ জন্মেজয়ৰ পত্নীয়ে বণুৱা সকলক জলপান দিৱলৈ গৈ দেখিলে যে বহু সংখ্যক টোকোৰা চৰাই তাইৰ মূৰৰ ওপৰে ইফাল-সিফাল কৰি ভয়ত চিঞঁৰি উৰি ফুৰিছে ৷ তললৈ চাই তাই দেখে যে তামোল গছবোৰত বাহ সাজি থকা টোকোৰা চৰাইৰ বাহবোৰ ভাগি ছিগি নষ্ট হোৱাৰ লগতে পোৱালীবোৰ মৰি য'ত ত'ত সিঁচৰিত হৈ পৰাৰ লগতে পৰুৱাই যেন জুম বান্ধিছে ৷ তাই তেনেকুৱা দৃশ্য এটা প্ৰতক্ষ্য কৰি মনটো ভাল নালাগিল ৷ ঘৰলৈ গৈ নিজৰ স্বামীক সকলো কথা কোৱাৰ লগতে বাকিখিনি তামোল গছবোৰ নাকাটি টোকোৰা চৰাইবোৰৰ আশ্ৰয়ৰ পাবে ৰাখি থৱলৈ ক'লে ৷
কিন্তু স্বামী জন্মেজয়ে তাইৰ কথাত একেবাৰে নাকচ কৰিলে ৷ সাত-আঠ বছৰীয়া পুত্ৰৰ বাবে গোটেই মাটিখিনিত
বোলে সি চাহ পুলি লগাব ৷ চাহ বাগিছাৰ ধনেৰে চাকৰী নকৰিলেও খাৱ পৰা পৰিকল্পনাৰে বাগিছাখন গঢ়িৱ খুজে জন্মেজয়ে ৷ তাই আৰু স্বামীক সৈমান কৰাৱ নোৱাৰিলে ৷
আনদিনাৰ দৰে তাই পুনৰ বণুৱা বিলাকক চাহ -জলপান দিবলৈ ওলোৱাত কম বয়সীয়া পুত্ৰই মাকক পিচপিনৰ পৰা মাত দিলে-- "মা মইয়ো তোমাৰ লগত যাম ৷" মাকে সন্মতি দিয়াত লগতে যাৱলৈ ওলাল ৷
জন্মেজয়ে কাম কৰা ঠাইতে মানুহ বিলাকক কিবা কিবি ইফাল -সিফাল দেখুওৱাই আছিল ৷ দেউতাকক দেখাৰ মাত্ৰে সি দেউতাকৰ কাষলৈ লৰি গ'ল ৷ বুটলি পোৱা এটি টোকোৰা চৰাইৰ বাহ দেউতাকক দেখুওৱাই এইটো কি সুধিলত দেউতাকে বুজাই দিলে ৷ সি চৰাইৰ বাহবোৰ ঘৰত ওমলিবৰ বাবে বুটলি ফুৰিৱলৈ লাগিল ৷
হঠাৎ তামোল এজোপা বাগৰি পৰাত মানুহবোৰৰ ভিৰ আৰু হুলস্থূলত জন্মেজয়ৰ চকু ঘূৰিল ৷ দৌৰি দৌৰি গৈ ঠাইডোখৰ পাওঁতেই যেন মূৰত আকাশী সৰগ খন ভাগি পৰিল ৷ পত্নীৰ হিয়া ভগা কান্দোনত ৷ জন্মেজয়ক দেখি তাইৰ কান্দোন দুগুন চৰিল ৷ কান্দি কান্দিয়েই জন্মেজয়ক কৱলৈ ধৰিলে " লোকৰ ঘৰ ভাঙি নিজৰ সুবিধা কৰিৱলৈ চাওঁতে যাৰ সুবিধা হৱ বুলি ভাৱিছিল সি আৰু নাই আজিৰ পৰা ৷" মূৰটোৰ সম্পূৰ্ণ অংশ চুৰমাৰ হৈ পৰা মৃত পুত্ৰৰ শৰীৰটো চুই যেন জন্মেজয় মৌন আৰু নিথৰ হৈ পৰিল ৷
সমাপ্ত
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ