কৃষকৰ প্ৰাণৰ প্ৰাণ বৰ্ষা ঋতু- নিপু কুমাৰ দাস

বৰ্ষা তুমি যেন ঋতু নহয় প্ৰাণৰ প্ৰাণ ,

কৃষক আৰু পথাৰৰ সঞ্জীৱনী

চহা খেতিয়কৰ জীয়া জীৱন।

পথাৰৰ পলসুৱা মাটি 

যাৰ বুকুতেই উঠে থন ধৰি 

সোণোৱালী শইচৰ ভবিষ্যত সপোন ।

উন্মনা বৰ্ষাৰ উন্মাদনাৰ বতৰা পাই 

সেউজী বসুন্ধৰাই ন-ৰূপ লয়, 

শস্য-শ্যামলা পথাৰখনি যৌৱনমতী হয় 

আই বসুমতী উঠে প্ৰাণ সঞ্চাৰি ,

সেউজী বোলেৰে সপোনৰ ৰহণ সানি   

শাওন আহিছে নামি ধৰাৰ বুকুলৈ ।

কেঁচা মাটিৰ উৰ্বৰতাৰ গোন্ধই  

বৰ্ষা ঋতুৱে আনে সুবাস কঢ়িয়াই ,

বোকাময় শাওণী পথাৰৰ অন্য ৰূপ  

চৌদিশেই নান্দনিক দৃশ্যৰ সেউজ উপমা 

ব্ৰহ্ম পুৱাতে কান্ধত নাঙল-যুঁৱলি লৈ 

চহা কৃষকে হাল বাই পথাৰখন গ'ল চহাই ।

বুকুত মেঠনি বান্ধি হাতত কঠিয়াৰ মুঠি 

জাক জাক ৰোৱনী শাওণৰ শুৱনি ,

ৰোৱনীৰ হাতৰ পৰশ লাগি প্ৰাণ পাই উঠে  

শাওনৰ সেউজী ধাননি পথাৰ উপচি ।

আশাৰ ৰঙীন সপোন কঢ়িয়াই যেন  

পথাৰ নদন বদন সোণোৱালী ধান।

 

শাওনী পথাৰৰ বোকা পানী গচকি 

ৰোৱনীয়ে কঠিয়া ৰুৱাৰ সঁজাল স্মৃতি 

আজিও বুকুত ফুৰিছোঁ কঢ়িয়াই ,

চহা জীৱনত কৃষকৰ ভৱিষ্যতৰ সপোন

বৰ্ষা ঋতু তুমি যেন ধৰাৰ বুকু উপচাই 

জীয়াই থকাৰ বাসনাত কৃষকৰ জীৱন ঠিকনা।