আঘোণৰ পূৰ্ণিমা -ৰজনী কুমাৰ ডেকা

আহৈ আহ বান্ধৈহঁত ওলাই আহ

আঘোণৰ পূৰ্ণিমা আজি লৰা-লৰিকৈ আহ  

চুবুৰীয়াৰ চোতালত মহ খেদিবলৈ আহ৷

নৰাৰে মুকুট পিন্ধিম, শুকান কলপাতেৰে ভালুকৰ সাজ পিন্ধিম,

মুখত সাজিম বনৰ বনবীৰ,

বাঁহৰ টোকোৰাটি যতনাই ল,

হাতে-হাতে লাঠি-ডাং  ল ৷

কান্ধৰ জোলোঙা খন নেৰিবি

বোপা-ককাৰ ৰসাল গীতবোৰ জুৰিবি৷

আমি চেমনীয়া মহ-খেদাৰ  সুৰীয়া 

হেৰ মহ অহা-বাটে উভতি যা 

গৃহস্থৰ কুশল কামনা কৰি যা  ৷

গৃহস্থই বিচাৰিব আৰ্শীবাদ, শৰাইখন আগবঢ়াব চেমনীয়াৰ চৰণ ধুৱাব৷

আমি কামনা কৰিম গৃহস্থ কুশলে থাক, আই কুশলে থাক ,

আঘোণৰ পূৰ্ণিমাই কঢ়িয়াই আনক 

অনাবিল আনন্দ, বান্ধৈহঁত ওলাই

আহ, আইৰ সংস্কৃতি জীয়াই ৰাখোঁ আহ ৷