দোকানৰ পৰিসৰ বৃদ্ধি পোৱাৰ লগে লগে বস্তুৰ দৰদামৰ তাৰতম্যৰ কথা আহি পৰিছিল । নিৰ্মল কুমাৰে যিহেতু নতুনকৈ দোকান খুলিছিল সেয়ে প্ৰতিটো বস্তুৰে কিনা দাম আৰু বেচা দামৰ পাৰ্থক্য বৰ ভালদৰে নাজানিছিল । হয়তো কোনোবা এটা বস্তুৰ দাম বেছি হৈ পৰে আকৌ কোনোবাটো কম দামতে দি পঠিয়ায় । এনেদৰে পাৰ হৈ গৈছিল দোকানৰ সময় ।
খ্ৰীষ্টান ধৰ্মাৱলম্বী লোকসকলৰ বিহু পালেহি । বৰদিনৰ দিনা বিদ্যালয় বন্ধ । নিৰ্মল কুমাৰে বসবাস কৰা গাঁৱখনত একেবাৰে পূবৰ ফালে তিনিআলিৰ ওচৰৰ পৰা এক কিলোমিটাৰ দূৰত্বৰ ভিতৰত কছাৰী সকলে বসবাস কৰে , তাৰ পিছত আদিবাসী বঙালী চাহ জনজাতিৰ লোক কেইঘৰমান আছে । গাঁৱৰ মাজভাগত কামৰূপ জিলাৰ হাজো ৰামদিয়াৰ পৰা অহা ৩৫/৪০ ঘৰমান কলিতা মানুহে বসবাস কৰে । এই লোকসকলক উজনি অসমৰ জনসাধাৰণে গুৱাহাটীয়া বা কামৰূপীয়া মানুহ বুলি কয় । কোনো কোনোৱে আকৌ হাজো ৰামদিয়াৰ পৰা অহা কাৰণে ৰামদেলীয়া বুলিও কয় । মাজে মাজে আহোম চুতীয়া ৫০ /৬০ ঘৰমান গোটেই গাঁৱতে সিঁচৰতি হৈ আছে । এইসমূহ লোক গোলাঘাট জিলাৰ কমাৰবন্ধাৰ শালিকীহাট আঠখেলীয়া বৰহোলা বৰকছাৰী ৰাঙলীবাৰী মহিমাবাৰী আদি ঠাইৰ পৰা অহা । গাঁৱখনৰ পশ্চিমে একেবাৰে সীমাতে তিনি চাৰিঘৰ শৰ্মা আৰু ভাগৱতী উপাধিৰ বামুণ ( ব্ৰাহ্মণ ) মানুহে বসবাস কৰে ।
এসময়ত প্ৰায় ১৯৭৭/৭৮ চনতেই শালিকীহাটৰ পৰা চুঙাজানলৈ অহা এই বামুণ সকলৰ এগৰাকী পণ্ডিতেই সেই অঞ্চলত শান্তিপুৰ নৱজ্যোতি প্ৰাথমিক বিদ্যালয় স্থাপন কৰে আৰু তেতিয়াৰ পৰাই সেইখন গাঁৱৰ শ শ ল'ৰা ছোৱালীয়ে পঢ়া শুনা কৰি আগ বাঢ়ি আহিছে । এই মহান হেড পণ্ডিত গৰাকী আছিল শ্ৰদ্ধাৰ প্ৰদীপ শৰ্মা ছাৰ । সকলোৱে হেড পণ্ডিত বা হেড ছাৰ বুলি মাতিছিল । অৱশ্যে নতুনকৈ এগৰাকী শিক্ষকে যোগদান কৰাৰ পিছত হেডছাৰৰ নাম পুৰণা ছাৰ আৰু নতুনকৈ অহাজনৰ নাম নতুন ছাৰ হ'ল গৈ । নতুন ছাৰৰ নাম সৰ্বেশ্বৰ শইকীয়া । হেড পণ্ডিত গৰাকীয়ে ৩৫/৩৬ বছৰীয়া শিক্ষকতা জীৱনৰ অন্তিম সময়চোৱাত ২০১৩ চনতহে বিদ্যালয় প্ৰাদেশিকীকৰণ হৈছিল । মাথো ১৪ মাহ চৰকাৰী দৰমহা পাবলৈ সক্ষম হৈছিল । সঁচাকৈ বৰ দুখ লাগে । ইমান বছৰে শিক্ষকতা কৰাৰ পিছতো চৰকাৰৰ তৰফৰ পৰা পেঞ্চন লাভ কৰিবলৈও সক্ষম নহ'ল । অসম গণ পৰিষদ চৰকাৰে ৰামঠগন দিয়াত সেই দলৰ প্ৰতি মোহভঙ্গ ঘটিছিল আৰু অৱশেষত কংগ্ৰেছ চৰকাৰৰ দিনত প্ৰাদেশিকীকৰণ কৰিবলৈ সক্ষম হৈছিল । ছাৰৰ অসীম ত্যাগ কষ্টৰ বিনিময়ত এতিয়া টেটৰ শিক্ষকে ঠেঙৰ ওপৰত ভৰি তুলি খাব পৰা হ'ল । আনহাতে ছাৰে অৱসৰ গ্ৰহণ কৰাৰ পিছত এখন বিদায় সম্বৰ্দ্ধনা সভাৰো আয়োজন নকৰিলে । বেয়া লাগে নতুনকৈ দায়িত্বভাৰ গ্ৰহণ কৰা শিক্ষকসকলে অগ্ৰজজনক সন্মান প্ৰদৰ্শন নকৰাৰ বাবে ।
বৰদিনৰ দিনাৰ পৰাই গোটেই গাঁৱখনত জুমুৰ গাবলৈ আৰম্ভ কৰে । গাঁৱখনৰ আহোম চুতীয়া কোচ কলিতা কছাৰী সকলোৱে মিলি আদিবাসী লোকসকলৰ লগত জুমুৰ গাবলৈ আৰম্ভ কৰে । ঘৰে ঘৰে গৈ জুমুৰ পৰিবেশন কৰে । ভাল লাগে এনে মিলাপ্ৰীতি দেখি ।
লাহে লাহে নতুন বছৰ পালেহি । পুৰণি বছৰৰ বিদায় পৰ্ব ইতিমধ্যে আৰম্ভ হৈছেই । সিদিনা নিৰ্মল কুমাৰৰ বন্ধু ৰত্নজিৎ আহিছিল বিকাশৰ সতে । বন্ধুয়ে দোকান আৰম্ভ কৰাৰ কথা গম পাই সি পাক মাৰিছিল । কথা বতৰা পতাৰ অন্ততঃ ঠিক কৰিছিল পুৰণি বছৰৰ বিদায় পৰ্ব ক'ত আয়োজন কৰা হয় । ৩১ ডিচেম্বৰৰ দিনা দুপৰীয়া সময়ত ধনশিৰি নৈৰ পাৰত কেইজনমান লগ হৈ বনভোজৰ আয়োজন কৰাৰ সিদ্ধান্ত হ'ল । পিছদিনাখন সকলো সাজু হ'ল ।
( আগলৈ )
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ