সেইদিনাৰ সপোন•কংকন বেজবৰুৱা

সেইদিনা আছিলা তুমি

মোৰ নিচেই ওচৰতেই

ভবা নাছিলোঁ হঠাতেই আঁতৰি যাবা বুলি

মনত পুহি ৰখাবোৰ কোৱাই নহ'ল

তোমাৰ ওঁঠৰ মৌ-সনা হাঁহিটোৱে যে

মোক বৰকৈ আমনি কৰিছিল জানা

তুমি যোৱা সেই বাটেৰে ৰৈ থাকোঁ

এদিন তুমি উভতি আহিবা বুলি

এৰা, এইবোৰনো তুমি ক'ত বুজি পাবা

তোমাকটো কথাবোৰ কোৱাৰ সময়ে নহ'ল

মইটো ভবা নাছিলোঁ তুমি এনেকৈ এদিন

নিজক বিচাৰি আনক পাহৰি যাবা বুলি

হঠাতেই গ'লাগৈ কোনোবা দূৰণিবটীয়া বাটেৰে

কোনো অচিন ঠাইলৈ নিজক বিচাৰি

মই, মইটো এতিয়া সেইদিনাৰ সপোন লৈ

ৰৈ আছোঁ তুমি উভতি অহাৰ বাটত।