সন্ধান?

Rinku Rajowar
0
দুয়ো পাৰে কেৱল ঢৌখেলা 
হালধীয়া আৰু সেউজীয়াৰ 
বিস্তীৰ্ন মখমলীয়া চাদৰ । 
অকোৱা-পকোৱা 
ওখোৰা-মোখোৰা 
ধূলিয়ৰী বাটেৰে 
অকলশৰে আগবাঢ়িছো 
সৌ গাওঁখনিলৈ । 
স্পৰ্শৰ সুখানুভূতিত 
প্ৰতিটো খোজ 
ধূলি আৰু প্ৰস্তৰখণ্ডৰ 
মিঠা মিঠা চুমা 
যেন অতীতলৈহে মোৰ যাত্ৰা । 
লাহে লাহে  আগবাঢ়িছো- 
হঠাত মোৰ সমস্ত 
অনুভূতি থমকি ৰ'ল- 
নিতাল নিস্তব্ধ 
লেখমাত্ৰ ঢৌহীন 
যেন এটা ফটফটীয়া 
পানীৰ হ্ৰদ । 
প্ৰতিবিম্বিত তাত 
প্ৰাপ্তি-অপ্ৰাপ্তিৰ হিচাব । 
ঘূৰ্ণী বতাহে তচ-নচ কৰা 
মোৰ শৰীৰৰ মূধচ । 
জীৱনৰ উদ্দেশ্যই বা কি ? 
পুনৰ এখোজ দুখোজ- 
গাওঁখনৰ সিমূৰে 
বাটটো য'ত শেষ 
তাতে থিয় হৈ সৌ চিনাকি 
পাহাৰটোলৈ অপলক গহন  দৃষ্টি । 
শিখৰত এতিয়া 
বৰফৰ চোলা । 
ৰ'দালিৰ মৰমত 
শুভ্ৰতাৰ চিকমিকনি । 
নামনিৰ ঢালত লঠঙা গছ 
শুকান ঘাঁহৰ মাজত 
এপাল ভেড়াৰ খাদ্য সন্ধান । 
বসন্তৰ আগমনত 
বৰফবোৰ লাহে লাহে 
আঁতৰি গ'ল । 
সমস্ত  পাহাৰ এতিয়া 
সেউজীয়া ফাকুগুৰিৰ 
এখন এঢলীয়া দলিচা 
খঁৰা শিয়াল আৰু 
কাঞ্চনমতীহঁতৰ 
হিয়া দিয়া নিয়াৰ 
বাসন্তী উৎসৱ । 
আকাশ এতিয়া গোমা । 
পাহাৰত আউলি-বাউলি 
বৰদৈচিলাৰ মমতাহীন 
মোক্ষম আঘাত । 
গৰ্ভৱতী আকাশৰ 
মেঘমল্লাৰ ৰাগ 
মুষলধাৰ বৰষুণ আৰু 
ব্ৰজপাতৰ সঘন নিৰ্মম প্ৰহাৰ । 
আকাশ এতিয়া  মুকলি- 
কত আচোঁৰ, কত নিষ্ঠুৰতা, 
কত পৰিবৰ্তন- 
তথাপি অলৰ-অচৰ । 
এৰা ! 
পাহাৰটোলৈ মোৰ বৰ ঈৰ্ষা 
তাৰ দৰে বীৰ্যবান 
নোহোৱাৰ দুখ । 
অনুভূতিত ধৰা দিছে-
তাতেই আছে মোৰ বাবে 
এখন গোপন ঠাই 
আলিবাবাৰ বিস্ময়কৰ 
ৰত্নগুহাটোৰ দৰেই । 
জীৱন-মুক্তিৰ ৰহস্যৰ সন্ধানত 
মই এতিয়া ধ্যানমগ্ন তাত ।

 সৌৰভ কুমাৰ বৰুৱা
          উঃ লখিমপুৰ

Post a Comment

0Comments

নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ

Post a Comment (0)