বতাহ উভতি আহিল,
যি বাটেৰে আগেয়ে আহিছিল
ৰাতিৰ চৰাই
সেই বাটেৰেই উভতি আহিল
বিকট কিৰিলি পাৰি ৷
শুকান নিশাহ পাবলৈ
লেৰেলা ফাগুন উভতি আহিল,
উভতি আহিল প্ৰিয়
পলাশীৰ ৰঙাবোৰ ৷
ক'ত বছৰৰ পাছত
আজি এই
সন্ধিয়া উভতি আহিল,
তাইৰ হাতৰ
মাতাল আঙুলি শিখাত
মোৰ হাত ধৰি
নিজকে পাহৰি যোৱাৰ
সময় ৷
সকলো উভতি আহিল
ৰাতি নদীৰ
ঢৌবোৰ
বতাহত উৰি উৰি আহিছে..
নদীখন চাপি চাপি
আহিছে !
মোৰ জীৱন
উপকূলৰ এজোপা গছ
কেৱল বতাহৰ পহৰীয়া ৷
আকৌ সপোন বান্ধিছো
এটাৰ পিঠিত আন এটা সপোন!
পুনৰ জী উঠিছো
উভতি অহা প্ৰেয়সীক চাবলৈ ৷
🔰প্ৰণৱ খাৰজাৰা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ