তফাৎ

 

 জেঠ মহীয়া প্ৰখৰ ৰ'দ, পথাৰৰ পৰা আহি বুধুৱে ৰমাক চিঞৰিলে " অ' ৰাণীৰ মা পানী এগিলাচ দিয়া।" 

ৰাণী হ'ল বুধু আৰু ৰমাৰ একমাত্ৰ সন্তান । খেতি বাতি কৰি কোনোমতে তেওঁলোকৰ পৰিয়াল চলি আছে। ৰাণী দেখাত চুটি চাপৰ ,ক্ষীণ‌ ও বৰণত মিঠা। চুটি চাপৰ হোৱা বাবে ৰাণীক ২০ বছৰীয়া ছোৱালীৰ দৰে দেখাত নালাগে । ৰমাই পানী গিলাচ আনি বুধুক দি কলে, "শুনিছে ঘৰত একো চব্জী নাই বজাৰলৈ নাজায় নেকি?"।

"নাই অ' আজি কঠিয়াতলীত বহুত কাম আছে"- বুধুৱে নচাৎ কৰি উত্তৰ দিলে, "যায় যদি ৰাণীকে পঠিয়াই দিয়া‌ঁ ।" 

     আজি বুধবাৰ , গাওঁত একমাত্ৰ সপ্তাহিক বজাৰ ।বুধুৰ পথাৰৰ কাম থকা বাবে ৰাণীয়ে বজাৰলৈ যাবলৈ ওলাল । ৰাণী বজাৰ পালেগৈ দুই এটা পাচলী লৈ গেলামাল দোকানৰ আগত ৰ'ল । এজন লোক আহি তাইক উদেশ‍্যি কৈছে " অই ছোৱালী চাইড দে , নঞ্চেচ খোপা খালি আগে আগে হয় থাকে"। তাই মনে মনে আতৰ হৈ থিয় হৈ ৰ'ল।  তেনেতে তাইৰ চকুত পৰিল তাইক দিয়া চয়াবিনৰ পেকেট তোৰ ম‍্যাদ উকলি গৈছে ।

 "দোকানী দাদা এইটোৰ দেখোন দেট পাৰ হৈ গ'ল "- তাই কলে । 

"নাই একো নহয়"- ব‍্যপাৰী জনে কলে ।

"নাই দাদা এনে বোৰ বস্তু খালে মানুহ বেমাৰত পৰিব"- ৰাণীৰ উত্তৰ । 

"এ লবৰ আছে ল নহলে নাই । কত' মানুহে খাই আছে মৰা নাই , তহঁতিও নমৰ"- ব‍্যপাৰিয়ে মন্তব‍্য দিলে। "তহঁতি পঢ়া শুনা কৰিলে বুজি পাবি ,এইবোৰ দুই এটা শিকি নিজকে পণ্ডিত ভাবি লও" -ইতিকিং কৰি ব‍্যপাৰীয়ে পুনৰ কয় । 

ৰাণীয়ে কিবা কোৱাৰ আগতে অন‍্য গ্ৰাহক জনে কেৰাহীকৈ চাই কয় " ইহঁত এইবোৰ খোৱাৰে যোগ‍্য, মোক অলপ চাই দিবা দেই । "

ব‍্যপাৰী জনে কামলা জনক চিঞৰিলে "দাদাক নতুন বস্তাৰ পৰা দুই পেকেট ওলাই দে।"

   ৰাণী একো নকয় তাৰ পৰা আহিল। মানুহৰ চকু আৰু মগজুত ইমান তফাৎ কিহৰ?  । 'মোক চাই দিবা দেই' আৰু 'নতুন বস্তাৰ পৰা ওলাই দে, এই দুটা বাক‍্য‌ই তাইৰ মন মগজুত আমনিৰ সৃষ্টি কৰিছে। এনেকে ভাবি তাই ঘৰমুৱা হল । ঘৰলৈ আহি তাইৰ দুধাৰে চকুলো বব' ধৰিলে যেতিয়া তাই নিজৰ ডিষ্টিংচন , লেটাৰ মাৰ্কছ পোৱা চাৰ্টিফিকেট বোৰ চকুত পৰিল ।

  ✍️নবীন চন্দ্ৰ কুৰ্মী