জাৰণিৰ সিপাৰে

(লক্ষী নাথ চেতিয়া সমীপেষু)

দূৰৈৰ শিমলু জোপাৰ আগত

বৰকাঁহীৰ দৰে ফুলি উঠা 

মৰা আবেলিৰ বেলিয়ে 

খন্তেক ভাগৰ জুৰাইছে ।

বকিয়াইদি কেৰপাই ককা

ছাগলীকেইটা সমুখত লৈ

খুপি খুপি ঘৰলৈ উভটিছে

 

চগাবোৰ জাকে জাকে

উফন্দি উৰিছে 

তাৰ মাজেৰে সৌৱা শ্মশানলৈ

কাৰোবাৰ শৱ যাত্ৰা ।

বৰকাঁহীৰ মাজত দেখিছোঁ

চন্দ্ৰৰ দৰে কলংকিত 

মোৰেই  প্ৰতিবিম্ব ।

শিমলুৰ আগৰ পৰা

ফুলি উঠা বেলিয়ে

পিছফালৰ জাৰণিৰ সিপাৰলৈ 

হঠাত জপিয়াই দিলে

 

সিপাৰে আছে এখন 

সোণাৰু ফুলৰ নিগাজী পাম ।

📝সৌৰভ কুমাৰ বৰুৱা