পাণ-তামোল-০৩

( যোৱা সংখ্যাৰ পিছৰ পৰা )

গতিকে আমি অনুমান কৰিব পাৰো পাণ--তামোল আমাৰ গ্ৰাম্য সমাজৰ কিমান দৰকাৰী অংগ | পাণ--তামোলক ৰাগিয়াল দ্রব্য হিচাবেও গন্য কৰা হয় | কিছুমান লোকৰ বাবে ই আকৈ নিচা সদৃশ | পাণ--তামোল নহলে তেওঁলোক ক্ষন্তেক সময়ো থাকিব নোৱাৰে  | আমি এনেকুৱা দুই এক ককা আইতাক জানো যিয়ে ৰাতি টোপনীৰ পৰা উঠিও খুন্দনাত তামোল খুন্দি খায় | পাণ , তামোল , চুণ আৰু মলা ধপাত মিলাই খোৱা তামোলখনৰ বোলে জুটিয়েই বেলেগ | সেয়া খোৱা জনেহে বুজিব | আনে বুজিব নোৱাৰে | কিছুমান মানুহে তামোল পানীত গোড়াই থৈ খায় | কিছুমানে আকৌ শুকুৱাই চুপাৰি কৰিও খায় | কেঁচা তামোল , বুঢ়া তামোল , গেলা তামোল , চুপাৰি আদি | গেলা তামোলৰ কি বিকত গোন্ধ ,তাৰ বাবে কোনো কোনোৱে ভাল নাপায় | বিভিন্ন নাম তামোলৰ | ধান কটা সময়ত তামোলে চালি ধৰে , পানীটো মাৰ গৈ অলপ পাতল ডাঠ হয় , সেয়া চালিৰ সৈতে খাবলৈ বৰ মজা হয় | কিছুমান তামোল আকৌ সাংঘাটিক ই যদি মূৰত ধৰে তেতিয়া খাওঁতা জনৰ অৱস্থা কাঢ়িল কৰি তোলে | আকৌ তামোল খাই চৰচৰনি খাব লাগিলে হল আৰু | তামোলৰ কিছু ভাল গুণ নথকাও নহয় | পাণৰ লগত মিলাই খালে মুখৰ দুৰ্গন্ধৰ লগতে আন কিছু সৰু সৰা ৰোগ ভাল কৰে বুলি লোকে কয় | কিছুমান লোকে আকৌ তামোলক সহ্যই কৰিব নোৱাৰে তাৰ লগতে তামোল খোৱা মানুহকো দেখিব নোৱাৰে | তেওঁলোকৰ ঘৰত তামোল নিসিদ্ধ |

       সমাপ্ত~

📝 হেমেন হাজৰিকা,মিৰ্জা