ক্ৰমান্বয়ে হেৰাই গৈছোঁ আমি

ক্ৰমান্বয়ে যেন হেৰাই গৈছোঁ আমি

হেৰাই গৈ আছে আমাৰ ঠিকনা,

দুচকুত জিলিকা সোণোৱালী সপোনবোৰও

যেন ফালৰি কাটিছে জীৱনৰ পৰা,

স্তব্ধ হৈ পৰিছে জনজীৱন

উন্নতিৰ সাধনা৷

দুৰ্বিষহ বিভীষিকাময় পৰিস্থিতি কেউদিশে...

মৃত্যুদূত যেন পিয়াপি দি ফুৰিছে সকলোতে

কেনেবাকৈ সংস্পৰ্শলৈ আহিলে

 আৰু ৰক্ষা নাই,

গ্ৰাস কৰিব পৰিয়ালৰ সকলোকে৷

এটাৰ পিছত এটা লানি নিছিগা 

ভয়াবহ দুৰ্যোগ,

কিযে কৰুণ দৃশ্য!

জুইৰ লেলিহান শিখাই 

ছানি ধৰিছে বাঘজান,

ক’লা ধোঁৱাই  বিনষ্ট কৰিছে সেউজীয়া ৷

বানত ককবকাই আছে ৰাজ্যবাসী

উটুৱাই লৈ গৈছে ঘৰদুৱাৰ,

এমুঠি অন্ন আৰু এডোখৰ আশ্ৰয়ৰ বাবে কৰিছে হাহাঁকাৰ ৷

অঘোষিত যুদ্ধত ব্যতিব্যস্ত সকলো

বিদেশত থকা ঘৰৰ ল’ৰাই 

স্বদেশলৈ ঘূৰি আহিও সোমাব নোৱাৰে আপোন ঘৰখনত,

হ’ব লাগে কোৱাৰেন্টাইন৷

দিনৰাতি একাকাৰ কৰি যুঁজি আছে 

আমাৰ ডাক্তৰ-নাৰ্ছ 

পুলিচ আৰু অন্যান্য স্বাস্থ্যকৰ্মী৷

তথাপিও আমি আশাবাদী

এদিন সুদিন আহিব

নতুন দিনত নৱছন্দত 

পক্ষীয়ে গীত জুৰিব,

আঁতৰিব এন্ধাৰ

বিজয়ৰ নিচান উৰুৱাই 

গাম আমি সমন্বয়ৰ গান৷

    

📝 কানন গোস্বামী

     ধুবুৰী