শিলৰ আখ্যান

'শিলৰ দৰে কঠিন হিয়া, 

আবেগ -অনুভূতিৰ 

স্হান নাই ।' 

এনেদৰে কৈ  বহুজনক  দোষাৰোপ কৰিছোঁ অজানিতে! 

শিলাবৃষ্টিত ধৰাশায়ী হোৱা ফুলনিৰ ফুলৰ উচুপনিৰ মৰ্মবেদনাও  কেতিয়াবা  অনুভৱ কৰিছোঁ !

'মহাপুৰুষৰ বাণী হেনো  শিলৰ ৰেখা !'

কথাবোৰ বাৰু সত্যৰ ওপৰত প্ৰতিষ্ঠিত নে?  

মনত বহু  প্ৰশ্নৰ  উদয় হয়;

আন্দোলনৰ গইনা লৈ দুষ্কৃতিকাৰীয়ে শিল দলিয়াই চৰকাৰী সম্পত্তি ধ্বংস কৰাটোও জানো শিলৰ  দোষ? 

আততায়ীয়ে

শিলেৰে মৰিয়াই  নিৰপৰাধীজনক হত্যা কৰা  নিৰ্মম   প্ৰক্ৰিয়াও জানো  এক  পৃথক অধ্যায় নহয় ? ?

জানানে,

শিলবোৰ আমি ভবাৰ দৰে কঠিন নহয়! 

শিলৰ বক্ষ বিদাৰি সৃষ্টিৰ হয় ৰচনা, 

শিল্পীয়ে ভাস্কৰ্যৰ ইতিহাস ৰচে;

শিল ভাঙি গুড়ি কৰি বাট  গঢ়ে বনুৱাই ।

অট্টালিকাবোৰো জানো শিলেৰেই নিৰ্মাণ হোৱা নাই? 

কঠিন শিল ঘঁহি নিমজ কৰি চলি আছে  আৰু ক'ত কাৰুকাৰ্য চমৎকাৰ! 

শিলৰ বুকুতে লুকাই আছে দেশৰ বুৰঞ্জী,  সভ্যতা আৰু সংস্কৃতিৰ;

যি সেঁতুৰে আজি জীৱন আগুৱায়।

অথচ ,

 শিলে সহিব লাগে কঠিনতম পৰীক্ষা !

আমিও জানো যে   শিলালিপিতে লেখা  থাকে জাতিৰ পৰিচয়।

শিল,  তোমাৰ  আখ্যান সচাঁকৈয়ে সুন্দৰ ।

তোমাক কৰযোৰে কৰোঁ নমস্কাৰ! !

📝ৰীতামণি বৰদলৈ

  (গুৱাহাটী )