ৰাজনীতি

মূল : মণীশ সিংহ ৰায় (বাংলা)

অসমীয়া অনুবাদ : কুমুদ ঘোষ

দধিচী মুনি উভতি আহিল ।

ক্ৰুদ্ধ,

ওলোটাই বিচাৰিলে হাড় ।

ক'লে - 'বজ্ৰৰ ইমান কিয় ভুল ব্যৱহাৰ ।'

মাজনিশা জোনাকি-পৰুৱাবোৰে বাট হেৰুৱালে ।

কঁপি উঠিল মনালিছাৰ ছবি ।

পৃথিৱীৰ অন্ধ শাসকহঁতে পৰস্পৰলৈ আঙুলি টোৱাই

চিঞৰি উঠিল - ৰাজনীতি ! ৰাজনীতি !

এই দৃশ্যৰ কথা শুনি বৃদ্ধ ধৃতৰাষ্ট্ৰই

মিচিকিয়া-হাঁহি মাৰিলে । ¤ ¤ ¤

কবি পৰিচয় : মণীশ সিংহ ৰায়ৰ জন্ম অসমৰ ধুবুৰীত । ১৯৭৪ চনত শিক্ষা গ্ৰহণৰ বাবে কলকাতালৈ যাত্ৰা আৰু তেতিয়াৰ পৰাই কলকাতা নিৱাসী । আশীৰ দশকৰ প্ৰথমভাগত কাব্যক্ষেত্ৰত আত্মপ্ৰকাশ । 'দেশ'ৰ দৰে আগশাৰীৰ আলোচনীত কবিতা প্ৰকাশ হৈছে যদিও তেখেত মূলত: লিটল মেগাজিনৰ কবি । আশীৰ দশকৰ প্ৰথম ভাগৰ পৰা ধুৰ্জটি চন্দ সম্পাদিত সেই সময়ৰ বিখ্যাত লিটল মেগাজিন 'এবং'ৰ সৈতে জৰিত । পৰৱৰ্তী সময়ত অৰ্থাৎ নব্বৈৰ দশকৰ পৰা বৰ্তমানলৈকে আন এক বিখ্যাত সাহিত্য আলোচনী 'কৌৰব'ৰ সম্পাদকমণ্ডলীৰ এজন হিচাপে যুক্ত । প্ৰচাৰবিমুখ কবিজন বিগত প্ৰায় চল্লিছ বছৰ কাল কাব্য-চৰ্চাত জৰিত যদিও বৰ্তমানলৈকে তেখেতৰ কোনো কাব্য সঙ্কলন প্ৰকাশ হোৱা নাই । তেখেতৰ কবিতা অসমীয়া ভাষালৈ অনুবাদ কৰাৰ অনুমতি প্ৰদান কৰাৰ বাবে আমি ব্যক্তিগতভাবে তেখেতৰ ওচৰত কৃতজ্ঞ ।