বাস্তৱ (অণুগল্প)

মহিলা সমিতিৰ সভালৈ বুলি মানুহজনীয়ে খৰখেদকৈ কামবোৰ কৰি আজৰি হৈছে। আজি তেওঁ এখন সভাত বক্তৃতা দিব লাগিব। ভ্ৰুণ হত্যাৰ প্ৰতিবাদত এটি লেখা প্ৰস্তুত কৰি থৈছে তেওঁ। আকৌ এবাৰ ভালকৈ তাত চকু ফুৰাই ল'লে আৰু গাড়ীখন লৈ ওলাই গ'ল। হঠাৎ কিবা এটা মনত পৰি আকৌ ঘূৰি আহিল। এটা পলিথিন টোপোলা লৈ ওলাই গ'ল। বাটতে তেওঁ টোপোলাটো পথৰ কাষৰ ডাষ্টবিনত পেলাই থৈ গ'ল। 

         অলপ পাছতে এজাক ভোকাতুৰ কুকুৰে মাংসপিণ্ডবোৰৰ সোৱোদ লৈ থকা দেখা পোৱা গ'ল।

  

✍️ প্ৰজ্ঞা দেৱী ভূঞা

      শিৱসাগৰ