মানুহে মানুহৰ বাবে-০৩

টাটালৈ আহিলে চিন্তা কৰিব  লগা একো নাথাকে বুজিছা । ইয়াত  দুই  এদিন  দেৰি হলেই ধৈৰ্য  হেৰুৱাই  আন হস্পিটেললৈ দৌৰ মাৰিব নালাগে । তেনেক্ষেত্ৰত  কিন্তু  নিজৰ  লোকচান হোৱাৰ  আশংকা বেছি।        
 দিপ্তীৰ  কথা সচাঁ ।ৰামানুজেও  ভাবিছে তাকেই  ।
     মুম্বাই  আহি পোৱাৰ  দুদিন  পাছত  দিপ্তীযে  ঘৰলৈ ফোন  কৰিছিল  ।  নিজৰ  ল'ৰাৰ  দৰে ডাঙৰ  দীঘল  কৰা  ৰমেনৰ  লগত কথা  পাতিছিল  তাই  । সেই  সময়ত  ৰুমত  কোনো  নাছিল  । অৰিন্দম  কেনিবা  ওলাই  গৈছিল  । বেৰৰ ফালে মুখ কৰি কথা  পাতি  থকা  দিপ্তীয়ে ৰামানুজ দৰজা মুখত থিয় হৈ  থকা  গম পোৱা  নাছিল । তাইৰ  মুখৰ পৰা  ওলোৱা  কেইটামান  কথা  ৰামানুজৰ  কাণত  পৰিছিল  ।
     --মই  ভাল  হ'ম বোলে ......অ'   মই   ভাল  হ'ম  হেনো .......
..........মই  যাম   নহয়.....তোক  তেতিয়া  দেখুৱাই  দিম  ।
      কথাষাৰ শুনি ৰামানুজৰ  বুকুখন  মোচৰ  খাই  উঠিছিল  ।  '' মই   ভাল  হ'ম     হেনো  ''   কিমান  অনিশ্চয়তাৰ  গৰ্ভত  নিমজ্জিত  হৈ আছে  মানুহ জনী  ।     ভাল হ'ব  হেনো   । তাৰ মানে  নহ'বও  পাৰে --- । শেষৰ  ফালে  দিপ্তীৰ  মাতষাৰ কঁপিছিল  । ৰামানুজ আতঁৰি  আহিছিল  । সেইদিনাৰ  প্ৰসঙ্গটো কেতিয়াও তাইৰ  আগত উলিওৱা  নাছিল  ।
     সেই  একেজনী মানুহেই আজি  ৰোগীৰ অভিভাৱকক  বুজাব  পৰা  হৈছে  । ৰোগীৰ  মনলৈ  আত্মবিশ্বাস  আনি দিব লাগে  । ৰোগীক  খুব মৰমেৰে  ৰাখিব লাগে  । কেঞ্চাৰ ৰোগৰ  আন এটা  চিকিৎসা  হল ''মৰম'' ।  বাহ !! ৰামানুজৰ মনটো ভাল  লাগি  আহিল  ।
     --বাবুজী   খালী  চেয়াৰ  নাহি  হে  ।
     ৰামানুজৰ কাষতে  থিয় হৈ  ল'ৰা এটাই কাৰোবাক  ক'লে  । সাধাৰণতে  এনেকুৱা  হৈয়ে  থাকে । থিয় হৈ  থাকিব  নোৱাৰা অতি দুৰ্বল  ৰোগীক বহুৱাবলৈ অভিভাৱকে খালী  ঠাই  বিচাৰি  ফুৰে  । কাৰোবাক  ৰিকুৱেষ্ট  কৰে ।
     প্ৰথম  অৱস্থাত দিপ্তীক বহুৱাবলৈও  সি একেদৰেই       খালী চকী বিচাৰি  ফুৰিছিল  । কিন্তু 
 ইয়াত  সকলোৱে  সকলোকে সহায় কৰে । ৰোগী দেখিলেই  সুস্থ জনে ঘপহ্কৈ  থিয় হৈ  কয় ,  ' আইয়ে   ইধৰ বৈঠিএ  '  ।  যিহেতু  সকলো  একেখন  নাৱৰে যাত্ৰী  ।
     ল'ৰাটোৰ দৃষ্টি  অনুসৰণ কৰি  ৰামানুজে দেখিলে   বিছ-বাইছ বছৰ  বয়সৰ ছোৱালী এজনী সাৱটি  ধৰি মহিলা এগৰাকী লাহে-লাহে  আহি  আছে  । কাষে-কাষে  এজন পুৰুষ । হাতত এটা  ডাঙৰ  বেগ ।  তেওঁৰ  পাছে-পাছে  আৰু এজন  পুৰুষ । দুয়োৰে পিন্ধনত ধুতি  আৰু  কামিজ  । কেওজনৰে চিন্তা  জৰ্জৰিত  মলিন  মুখ । সেয়াই আচলতে  ইয়াত  স্বাভাৱিক  । হাঁহি  ইয়াত  সুলভ  নহয় । ডাৱৰৰ মাজৰ জোনৰ দৰে  কাৎচিতহে  দেখা  পোৱা  হয় ।       
     ছোৱালীজনী সাৱটি  ধৰি  অহা মহিলাগৰাকী অসুস্থ  বুলি ধাৰণা  হল ৰামানুজৰ  । সি ঠাইতে থিয় হৈ মহিলাগৰাকীলৈ  চাই  তাৰ  চকীখনলৈ ইঙ্গিতেৰে  মাতিলে  । সচাঁকৈয়ে  ক'তো এখনো চকী খালী  নাই  । ছোৱালী 
জনী ধৰি ধৰি  মহিলাগৰাকী চকীখনৰ  ওচৰ পালেহি  ।
--------------------আগলৈ---------------

✍️ভৰত ৰাজখোৱা

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send