শাওন

কেঁচা মাটি গোন্ধত আমোলমোলাই পথাৰখন ,

হালখনে খান্দি উলিয়াই তাৰ সপোনৰ চন্দুক

য’ৰ মণি মুকুতাবোৰ সোণগুটি হৈ লাগে ভৰ আঘোণত ৷

প্ৰিয় এই সকলো তাৰ

এই ৰঙা-বগা বলধ হাল,

বোকামাটি,

সেউজীয়াবোৰ আৰু তাৰ মাজৰ সৰু সৰু আলিবোৰ ৷

ইমান ভাল পাব পাৰিনে ইহঁতক?

তাৰ ৰাংঢালীজনীকো চোন ইয়াত তুলনা কৰিব নোৱাৰি !

শেতেলী এৰি তাইৰ কাষৰ পৰাচোন ইয়ালৈয়ে ঢাপলি মেলে ৷

আপোন পাহৰা হয় সি ইহঁতৰ মাজত, ৰঙা -বগায়েও যে ভালপায় তাক বহুত !  এচাৰিৰ কোববোৰ তাহাঁতৰ গাত পৰিলে তাৰেই গা চেবায় ৷

আটুম টোকাৰিকৈ ৰখা খেৰৰ ঘৰটোৰ বাৰাণ্ডাখন ইহঁতৰ বাবেই আচুতীয়া ৷

ৰঙাকৈ বেলিটো উঠি অহা এই ৰূপটো সি প্ৰায়েই দেখে,

ধলফাটৰ পূৰ্বেই যে সি নাঙল ধৰে ৷

তাইজনী আহিছে জলপান লৈ,

ৰঙা চাহপানীটোপাৰে তাৰ পিয়াহ আঁতৰে ৷

ৰঙা-বগাক ঠাইতে থৈ সি আঁতৰি আহিল ৰাংঢালীৰ হাতৰ জলপান ল’বলৈ....

✒️অনামিকা গোৱালা