আৰু এনেকৈ গৈ আছোঁ গৈ আছোঁ

বিষণ্ণ সুৰ এটাই মেৰিয়াই ধৰে

ঘৰমুখী পক্ষীজাকৰ কাকলিত 

এটা দিনৰ সকলো ঠিকনা সমাপ্তি ঘটাই

সন্ধিয়া বতাহজাকত উৰি অহা

নিৰ্জনতাবোৰত

খেপিয়াই চাওঁ নিজকে

কি পালোঁ আৰু কি হেৰুৱালোঁ

দিনটোৰ কৰ্মব্যস্ততাত ৷

দেউতাৰ গলহেকাৰি

জপনাখন বন্ধ কৰ

প্ৰতিদিনৰ নিয়মানুবৰ্তীতা প্ৰকাশ

কেতিয়াবা ভাল নলগা হৈ পৰে 

শুনা কথাবোৰ শুনি শুনি 

য’ত নতুনত্বৰ একোৱেই নাই ৷

গুৰুগৃহৰ পৰা ভাঁহি অহা

আই আকুল মিনতিয়ে

চেপি ধৰে জীয়া উশাহবোৰ ৷

--- নেদেখাজন আপোননে দেখাজন আপোন 

মানৱতাই পৰম ধৰ্ম

আই বিশ্বাসত কেতিয়াবা নাস্তিক হৈ উঠো

আইয়ে দুখ কৰে 

স্নেহৰ জৰীত আৱদ্ধ পৌনঃপুনিকৰ কথাবোৰ কাণত ঢালে 

বিশ্বাসে মিলয় হৰি 

ৰাখে হৰি মাৰে কোনে ---

তথাপিও 

আউল লগা জীৱনটোৰ নিজা বুলিবলৈ 

একো নাই নেকি

প্ৰশ্নবোৰ নিজৰ ওচৰত থমকি ৰোৱা আগতেই

দলিয়াই দিওঁ কুসংস্কাৰ

আৰু এনেকৈয়ে আগলৈ গৈ আছোঁ 

গৈ আছোঁ