মই বিধবা হোৱাটোৱেই ভুল আছিল নেকি


                        
মোৰ ভুল ক'ত হ'ল ! 
আচলতে ভুল মোৰ নে তহঁতৰ!  
মই বিধবা হোৱাটোৱেই ভুল আছিল নেকি? 
হমম... মই যে নাৰী 
সেয়ে হয়তো ময়ে হ'ম সুযোগ সন্ধানী । 
সমস্ত বস্ত্ৰ টানি- আজুঁৰি ফালি ,
মোৰ দেহৰ ওপৰত জপিয়াই পৰ' ৰাতি ৰাতি; 

তহঁতেই চোন টেটু ফালি চিঞৰ, 
নাৰী সুৰক্ষাৰ ওপৰত ডাঙৰ ডাঙৰ ভাষণ দিয় 
আৰু জাউৰিয়ে জাউৰিয়ে হাত তালি লৈ 
নিশা হোৱাৰ লগে লগে কি পাহৰি যাৱ 
তহঁতৰ নাৰী সুৰক্ষা! 

( হি হি ) মোৰ চোন এতিয়া অভাৱেই নাই , 
কাৰোবাৰ ক্ষুধা পূৰাব পাৰিলেই 
হাতত টকা ভৰি পৰে আহি । 
আচলতে তহঁত দিনত হ'লে ৰক্ষক  
আৰু ৰাতি হ'লে ভক্ষক 
মোৰ দৰে অৱহেলিত বিধবাক 
জীৱন জীয়াৰ লালসা দেখুৱাই 
নিজৰ প্ৰয়োজনত প্ৰকৃত স্বৰূপো দেখুৱাৱ উদঙাই ।
সেয়েহে কওঁ ,
তহঁত দিনত হ'লে ৰক্ষক 
আৰু ৰাতি হ'লে ভক্ষক ।

হিচাপ জানো আছে তহঁতৰ,
কিমান জনী যে তিৰোতাৰ নষ্ট কৰিলি ভ্ৰূণ  !
পিছে চলিব নো কিমান দিন এনে বেহা ! 
খোল খাবই তহঁতৰ মুখা ।
জীৱন জীয়াৰ লালসাত 
চুৰকেই পাতিছিলো ৰজা ।।

📝গাৰ্গী শিল্পী 

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send