ৰাজ্যৰ শিক্ষামন্ত্ৰী ডাঙৰীয়া, আপুনিয়ে অসমৰ স্বাস্থ্যমন্ত্ৰী নহয় জানো? এইযে চলিত মাহতে স্কুল খুলিব দিলে এইয়া আপোনাৰ তথাকথিত বিশেষজ্ঞ কমিটিৰ আহ্বান নে কেন্দ্ৰীয় চৰকাৰৰ নিৰ্দেশ যাক আপুনি কোনোপধ্যেই বিৰোধিতা কৰিব নোৱাৰে ৷ ইলেকছনৰ বতৰত নোৱাৰাটোৱে স্বাভাৱিক ৷ স্বাস্থ্যমন্ত্ৰী হিচাপে আপোনাৰ নিৰন্তৰ বক্তব্য শুনি আহিছোঁ ৷ স্বাস্থ্যকৰ্মী হিচাপে ক’ভিড ৰ সংক্ৰমণৰ ভয়াবহতা বুজোঁ ৷ অন্তত আজিৰ তাৰিখত ই চিন্তনীয় কাৰণ বাৰম্বাৰ আপুনিয়ে কৈছে চিকিৎসকৰ অভাৱ, বিচনাৰ অভাৱ, আইচিইউ অক্সিজেনৰ অভাৱৰ কথা ৷ ঢাক ঢোল বজাই নিজৰ প্ৰচাৰ কৰি থাকিলেও কিন্তু আপুনি ব্যৰ্থ হ’ল ৷ কংগ্ৰেছী নেতাক কাৰ প্লাজমা দিলে তাৰো খবৰ আপুনি ৰাখে, কিন্তু বিটিচি নিৰ্বাচনত আপোনাৰ সতীৰ্থই যে কোনো সামাজিক দূৰত্ব নমনাকৈ মাস্ক নিপিন্ধা শ শ মানুহৰ আগত ভাষণ দি থাকে তাৰ খৱৰ আপুনি হয়তো নাৰাখে ৷ এতিয়া শিক্ষামন্ত্ৰী হিচাপে আপুনিয়ে স্কুল খোলাৰ নিৰ্দেশ দিছে ৷ শিক্ষাৰ গুৰুত্ব আমি বুজোঁ ৷ কিন্তু ল’ৰা ছোৱালীৰ জীৱনৰ লগত নিশ্চয় কেইটামান মাহৰ ক্ষতিক ৰিজোৱা ভুল হ’ব ৷ নিয়মমাফিক বিদ্যালয় চেনিটাইজেচনৰ কথা কৈছে ৷ কিন্তু কিমানসময়ৰ মূৰে মূৰে চেনিটাইজ কৰা দৰকাৰ আপুনিতো জানেই, আমাৰ দৰে সাধাৰণ মানুহে সোঁৱৰাই দিয়াৰ প্ৰয়োজন নাই ৷ আপুনি হয়তো পুনৰ সফল মন্ত্ৰীৰ বাহবাহ লোৱাৰ এক প্ৰচেষ্টা কৰিছে ৷ আপোনাৰ দুৰ্বলতা তেতিয়াই প্ৰকাশ পালে যেতিয়াই আপুনি অভিভাৱকৰ এন ও চি ৰ প্ৰসংগ উলিয়ালে ৷ তাৰমানে আপুনিও জানে স্কুল খোলাৰ লগে লগে সংক্ৰমণো বাঢ়িব ।মাত্ৰ নিজৰ ওপৰত দোষৰ চেকা নপৰিবলৈ ছাত্ৰ ছাত্ৰীক গিনিপিগ সজাব বিচাৰিছে ৷ এতিয়া যিসকল নাহিব তেওঁলোকৰ বাবে নিশ্চয় একো বিশেষ ব্যৱস্থা আপুনি গ্ৰহণ কৰিব দিয়া নাই ৷ স্কুল আহিবলৈ অমান্তি হোৱা কেইজন আকৌ লগৰ কেইটা পঢ়াত আগুৱাই যোৱাৰ চিন্তাত মানসিক অশান্তিত ভূগিব, কাৰণ বয়সটোৱেই তেনেকুৱা ৷ অাপুনি দক্ষ, সন্দেহ নাই ৷ মাত্ৰ প্ৰতাপী মন্ত্ৰী বাবেই কিছুমান অদ্ভুত সিদ্ধান্ত নলব ৷ আপোনাৰ নিজৰ সন্তান কেইটা যেনেকৈ আপোনাৰ অতি মৰমৰ, আমাৰবোৰো আমাৰ মনত সমানেই মৰমিয়াল ৷
🖋️ ডাঃ প্ৰণৱ চক্ৰৱৰ্তী
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ