মই তোমাৰ আজন্ম প্ৰেমিকা
এজাক মুষলধাৰ ভদীয়া বৰষুণে
বোকোচাত তুলি আনিছে তোমাক
শুৱনি পৃথিৱীৰ শ্যামলী বুকুলৈ,
তাপিত প্ৰাণত শীতল পৰশ বুলাই দিবলৈ ।
বৰষুণে পখালি থোৱা মোৰ সুনিৰ্মল পদূলিত
সন্তৰ্পনে নামিবাহি তুমি ।
তোমাক আদৰিবলৈ ৰৈ আছোঁ মই
ধূপ দীপ নৈবেদ্যৰে শৰাই সজাই ।
তোমাৰ সুকোমল পৰশত
সেউজীয়া বোৰে প্ৰাণ পাই উঠিব,
আমোলমোল সুবাস সনা এচাটি মলয়াই
মোক বাউলী কৰিব ।
শাৰদী জোনাকে পোহৰাই তুলিব মোৰ চোতাল,
দুবৰিৰ দলিচাত তুমি সিঁচি দিবা
নিয়ৰৰ অলেখ তিৰবিৰ মুকুতা ।
এটি দুটিকৈ হাজাৰ মুকুতা মণি কোচ ভৰাই লৈ
বৰষুণৰ সুতাৰে সি থ'ম এধাৰি মালা ।
তোমাৰ ডিঙিত আলফুলে পিন্ধাই দিম সেই বৰমাল্য ,
হে শৰত, তুমি যে মোৰ চিৰ আকাঙ্খিত ।
ল'বা মোক আলফুলে সাবটি বুকুৰ মাজত ,
দিবা মোক তোমাৰ প্ৰেম আলিঙ্গন ।
তুমি যে শৰৎ কোঁৱৰ সৰগৰ ,
মই মৰতৰ অপ্সৰা
সুকোমল শেৱালি মই শুভ্ৰ বসনা ,
মই তোমাৰেই আজন্ম প্ৰেমিকা ।
✒️মনচুমী কলিতা নাথ
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ