মোবাইল চলোৱা ছোৱালীজনী-এন হক ( জান)

                    

লাজবোৰ একাষৰীয়া কৰি সৌন্দৰ্য্যৰ প্ৰতিযোগিতা 

তাইৰ আভিজাত্য দেহাত 

ৰাজআলিৰ গতিৰোধকবোৰে বাধা দিলেই 

ওফন্দি উঠে কৰদৈ যোৰ । 

শগুণীয়া লক্ষ্যবোৰ ঢুকি নোপোৱাকৈ 

অনৰ্গল স্পৰ্শ কৰি যায় 

মোবাইলৰ কীপেড । 

তাইৰ ভাৱনাৰ অৰণ্যত আউল নলগাকৈ 

অবাধ্য চুলিকোচা বতাহত উৰি আহি

চুই যায় তাইৰ দুগাল । 

শিহৰিত হয় ঢেঁকুৰাৰ কলিজা 

ওঁঠ চেলেকি তৃপ্তি পুৰায় 

প্ৰেমপ্ৰত্যাশী অনৈতিক অনুৰক্ত.....

সিহঁতৰ বাৰু অপৰাধ কি ?  

বৰফত উষ্ণতাৰ উচ্চ-চাপত বিগলিত তো হ'বই 

প্ৰয়োজন এখন সেউজীয়া পোচাক । 

গভীৰৰ পৰা গভীৰতমলৈ সোমাই যোৱা

মোবাইল চলোৱা ছোৱালীজনীৰ 

পূৰঠ আধুনিকতাই চৰিত্ৰ অৱক্ষয়ৰ 

স্বাক্ষৰ বৈ 

ক্ৰমশঃ 

খহি পৰে নৈতিক দৃষ্টিত। 

✍ এন হক ( জান)

হেলনাৰ পাম, হাউলী, বাক্সা