তাহানিৰ সেই সাধুটো
এতিয়াও সাৰে আছে ।
সেই যে সাউদৰ জীয়েকৰ সাধু !
ন কৈ গা ধৰা গাভৰুৰ সাধু।
পদুম চকুৰে ,
তিলফুলীয়া নাকেৰে,
কিচকিচিয়া চুলি ,
আলফুলীয়া দেহেৰে
এজনী মাউৰা ছোৱালীৰ সাধু।
আই বুলি পূজিছিল তাই,
মাহীমাকে বিশ্বাসঘাটকতা কৰিলে ।
হাত,ভৰি, মূৰ ঢেঁকীত খুন্দিলে ,
আধামৰা কৰি দলিয়াই পেলালে।
জাতিলাও ,জৰা টেঙা,
পদুম ফুল ,শালিকী হৈ তাই জীয়াই থাকিলে ।
তেজীমলাৰ সাধু হৈ
হৃদয়ত সোমালে ।
এতিয়াও জীয়াই আছে
বহু নাৰী নিৰ্যাতিতা হৈ ,
বাৰে বাৰে জী থাকে
তেজীমলা হৈ ।
আশাধাৰী আত্মাৰ মৰণ নাই,
মৰি মৰি জী থাকে সদায় ।
✍️মনচুমী কলিতা নাথ
মালৌআলি, যোৰহাট
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ