ফটকা~অণুগল্প- জয়শ্ৰী দাস

হেমেন দুখীয়া পৰিয়ালৰ ল'ৰা। তাৰ বয়স প্ৰায় ৭-৮ বছৰ হ'ব। বয়স কম বাবে তাৰ বুজা শক্তিও বেছি হোৱা নাই। সিহঁতৰ ঘৰৰ ওচৰৰে নীলম তাৰ সমবয়সীয়া। দুয়োজনে একেলগেই খেলা-ধূলা কৰে। নীলমৰ দেউতাকেই চাকৰি কৰে আৰু দীপাৱলী বুলি নীলমৰ বাবে বিভিন্ন প্ৰকাৰৰ ফটকা, আতচবাজি আনিছে। কিন্তু হেমেনৰ দেউতাকে হাতত থকা গোটেইখিনি পইচাৰে মাটিৰ চাকি আৰু বাকী সমল কিনোতে খৰচ কৰিলে যাৰ ফলত হেমেনৰ বাবে এটাও ফটকা আনিবলৈ দেউতাকৰ হাতত টকা নাবাচিল।প্ৰথমতে হেমেনেও ভাবি আছিল নীলমৰ দৰেই হেমেনৰ দেউতাকেও তাৰ বাবে বহুত ফটকা আনিব আৰু সিও নীলমক দেখুৱাবলৈ যাব। কিন্ত সি ভবাতকৈ ওলোটা হ'ল। সি বহুত কান্দিলে। মাক, দেউতাকহঁতে তাক বুজালে আৰু সিও অৱশেষত বুজি পালেই আৰু মাক -দেউতাকৰ লগত পদূলি মুখত মাটিৰ চাকি জ্বলাই ঘৰখনৰ চৌদিশ আলোকিত কৰি তুলিলে আৰু সি যেন ফটকা ফুটোৱাতকৈও বেছি আনন্দ লভিলে। নীলমেও মাক -দেউতাকৰ লগত ফটকা ফুটাই আছিল আৰু তেনেতে এটা ফটকা নীলমৰ হাততে ফুটি গ'ল আৰু নীলমৰ হাত খন পুৰিলে।আৰু তাক তৎকালীন চিকিৎসালয়ত নিব লগা হ'ল।

 ✍️জয়শ্ৰী দাস