গীত মহাসভাৰ নক্ষত্ৰ( মই ভাগৰা নাই, জীৱন হেৰোৱা নাই)- ময়ূৰী শৰ্মা গোস্বামী

জীৱন যাত্ৰাত যেতিয়া ভাগৰোঁ , 
সজীৱতা ঘূৰাই আনে - 
তোমাৰেই গানে ।
যেতিয়া হাহোঁ , 
যেতিয়া কান্দো , 
যেতিয়া অতীত বিচাৰি ঢপলিয়াও , 
ৰন্ধ্ৰে ৰন্ধ্ৰে অনুভূতি জগাই , 
তোমাৰেই গানে ।

তোমাৰ গীত আকাশ যেন
গীত তোমাৰ উশাহ যেন
তোমাৰ গীত ৰ'দ
আৰু জোনাক যেন। 
যেন বতাহ , 
শইচ সেউজীয়া , 
জীৱন জীয়াৰ যেন তোমাৰ গীততেই মায়া। 

বিপদ কালত তুমি , 
সম্পদ কালতো তুমি , 
তুমি যেন দুখৰ ঢাল । 
মহোৎসৱত তুমি  
উন্মোচনত তুমি । 
সংগ্ৰামত তুমি যেন চোকা তৰোৱাল ।

তুমিয়েই দেখুৱাইছা -
হেৰুৱাই হেৰুৱায়ো কি দৰে উৎসৰ্গিত জীৱন ।
বিলাই বিলায়ো কি দৰে - 
জীৱন উৎযাপন । 

তুমি নাগালে বহাগ নাহে । 
তোমাৰ সুৰে সুৰে ফাগুন নামে । 
তোমাৰ কথাৰ ছন্দই - 
নিয়ৰ আৰু শেৱালী। 
কাগজৰ নাওঁ বনাই - 
তোমাৰ গানৰ কথাই কথাই. - 
শৈশৱৰ হেজাৰ ধেমালি । 

তোমাৰ গানেই সংগ , 
জীৱনৰ নিসঙ্গতাত ।
তোমাৰ সুৰ বহি আছে,
হৃদয়ৰ নিভৃততাত। 
তুমি গীত মহাসভাৰ নক্ষত্ৰ । 
উজ্বলি থাকা চিৰদিন চিৰকাল হৈ জ্যোতিষ্ক ।

✍️ ময়ূৰী শৰ্মা গোস্বামী 

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send