তুমি ভাল লগা সপোনৰ মনমোহিনী-ৰমেন চাংমাই

এচাতি কোমল মলয়াৰ দৰে আহি                   

দেহ-মন শাঁত পেলাই যোৱা

তুমি ভাল লগা সপোনৰ মনমোহিনী ।

মই যেতিয়া অকলশৰে থাকো নিজানত 

এটি সুমধুৰ সুৰ হৈ তোমাৰ অনুভৱে

মোৰ শৰীৰত কোবাই

অজান শিঁহৰণৰ তুলি 

পুলকিত কৰি যায় ।

তোমাৰ প্ৰতিবিম্বই মোৰ হৃদয়ত 

হৰিণী নয়নীৰ ঝংকাৰ তোলে 

মুঠি মুঠি কৰি সাঁচি ৰখা

জোনাকবোৰ পঠাইছোঁ তোমালে ।

মই তোমাক ভাগৰি পৰিব দিয়া নাই

অতীতৰ মধুৰ স্মৃতিবোৰে ফঁহিয়াই চাই

মই জানো তুমি আছা কুশলেই !

তোমাৰ সীমাহীন মৰম

তোমাৰ অপাৰ প্ৰেৰণাৰে ভৰা  

মোৰ আশাভৰা অনুপম জীৱন

তোমাৰ মিছিকিয়া হাঁহি

বুকুৰ উমাল পৰশে

দি যায় জীৱনৰ নতুন ছন্দ ।

✍️ৰমেন চাংমাই