ধৰ্ম-প্ৰতুল এচ্ কলিতা

মোৰ জন্মই বা কিয়?

মোৰ নামৰ অৰ্থই বা ক'ত?

কেতিয়াবা যদি হিন্দু,

কেতিয়াবা মুছলমান

আকৌ কেতিয়াবা 

শিখ,বৌদ্ধ,খ্ৰীষ্টান

আৰু বহুতো ৷

মানৱতাৰ দুৱাৰ,খিৰিকী জপাই

মোৰ আনন্দই বা ক'ত?

কেতিয়াবা হিন্দু গোড়ামীত যদি 

থমকি ৰয় মোৰ সীমনা

আকৌ কেতিয়াবা মুছলমানৰ মাজত ৷

কেতিয়াবা মন্দিৰত,

কেতিয়াবা মছজিদত,

আকৌ কেতিয়াবা গীৰ্জাত ৷

গোড়ামীৰে বান্ধি যেন 

হাড়ে-ছালে লগা 

মোৰ অস্তিত্ব সংকটত ৷

মানৱতাৰ মাজত সৰ্বত্ৰে 

সিচঁৰিত নহৈ 

মই যেন সমাজত আজি 

বহুধা বিভক্ত...৷

মোৰ বাবেই জন্ম হয় 

প্ৰতিদিন ধৰ্মান্ধতাৰ এশটা দল ৷

মোৰ বাবেই...

বিভেদগামী চিন্তাৰে প্ৰতিদিন

আগবাঢ়ে প্ৰতিবাদী সমদল ৷৷৷

✍️প্ৰতুল এচ্ কলিতা

নলবাৰী