প্ৰিয় ৰঙ নীলা-প্ৰণৱ চক্ৰৱৰ্তী

নীলা ভেদি

গৰজি উঠে আকাশে,

ভয়ত উচুপে পৃথিৱী

কচুপাতৰ আঁৰত লুকাবলৈ ৰৈ থাকে কোনোবা ৷

নীলা ভেদি

বৰষুণ নামে,

বিজুলীয়ে চুমা দিয়ে

তাতো হয়তো থাকে সূত্ৰহীন মৰম ৷

অচিন গাভৰুৰ চুলি তিয়াই

চিনাকি বৰষুণ জাক

নামি আহে উঠন বুকুলৈ,

বিজুলীয়ে তচনচ কৰা হৃদয়ৰ

মলম হয় বৰষুণৰ টোপালবোৰ

চিনাকি হয় অচিনাকি গোন্ধবোৰ ৷

কেতিয়াবা উন্মাদ হব খুজি

সংযমী হৈ পৰে গাভৰুজনী,

বৰষুণজাক প্ৰিয় হৈ পৰে

আপোন হৈ পৰে সমস্ত নীলাবোৰ..

✍️ প্ৰণৱ চক্ৰৱৰ্তী

নলবাৰী