ছন্দহীন অনুভৱ-ডাঃ প্ৰণৱ চক্ৰৱৰ্তী

শিকলিৰে বান্ধিব নোৱাৰা
সময়ক নেওচি
এনেদৰে গুচি যোৱাৰ কথা 
কাহানিও নাছিল ,
আমাক শিলৰ দৰে
কঠিন হ’বলৈও শিকোৱা হোৱা নাছিল ৷
ধূলিয়ৰি বাটত নৃত্যৰ ছন্দ অঁকাৰ
বৃথা প্ৰয়াস কৰা হৈছিল ,
আচলতে তেনে নকৰিলে
ভিৰৰ মাজত হেৰাই যোৱাৰ
ভয়ে খুলি খুলি খাইছিল ,
সৈনিক হ’ব পৰাকৈ 
কলিজাত সাহস থাকিলেও
মগজুৱে হৃদয়ক পৰিচালনা কৰাত
বাৰে বাৰে ব্যৰ্থ হৈছিল ৷
তথাপিও
এনেদৰে গুচি যোৱাৰ কথা নাছিল
অৱকাশ নাছিল কোনো মহীয়সীৰ
ৰখীয়া হোৱাৰ
চাব বিচৰা হোৱা নাছিল
বেনামী ছন্দৰ নৃত্যৰ আখৰা ৷
মই হয়তো ঠিকেই
অনুমান কৰিছিলোঁ যুদ্ধৰ ক্ষণ ,
আখৰাৰ উমান পাইছিলা তুমিও
মাত্ৰ
খবৰ বিচাৰি ফুৰা জনতাই বিচৰা মতে
কচৰৎ কৰিব পাহৰিলা তুমি
পাহৰিলোঁ আমি...

✍️ ডাঃ প্ৰণৱ চক্ৰৱৰ্তী
নলবাৰী 

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send