মই জানো এইবাৰো তুমি আহিবা ।
মোৰ অপেক্ষাৰ অন্ত পেলাই
তোমাৰ খোজ পেলাবলৈ বেছিদিন নাই
কিন্তু মোৰ ভয় লাগে জানা
মোৰ বুকুত এতিয়া অন্ধকাৰ।
কোনে জানে এইবাৰো কিজানি
তুমি মোৰ সৰুকৈ সজা পঁজাটোক
তচ নচ কৰি যোৱা আগৰদৰে
মোৰটো উচুপনিত তুমিটো ৰৈ নোযোৱা
দুখ লাগে সেইবাবেহে জানা
তথাপিও তুমি আহিবা
চাই যাবাহি চিকুন কৰি ৰখা মোৰ পদুলি মুখ
যোৱাবাৰ তুমি খহাই থৈ যোৱা গছপাতবোৰ।
আকৌ ঠন ধৰি উঠিছে
তুমি অহাৰ অপেক্ষাত
মই জানো ,ফাগুন তুমি আহিবা।
✍️ নৱনীতা হাজৰিকা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ