ৰাজপ্ৰসাদত মোৰ
ঐশ্বৰ্য্য বিভূতি আৰু ভোগ বিলাসৰ
এক অভিনৱ ৰঙীন বাগিচা ।
মোৰ দূর্গৰ চাৰিওকাষে
সুগভীৰ দ' খাৱৈত
জাক জাক কুম্ভীৰৰ গর্জন ।
ওখ প্ৰাচীৰৰ তলে ওপৰে
অগণন সৈনিক আৰু বৰটোপৰ
বহু তৰপীয়া নিৰাপত্তাৰ বেহু ।
দূৰৈৰ শত্ৰু দূৰৈতে বিদূৰ কৰি
শান্তিৰ নিজৰাত সিঁচিলো
ভৌতিক কামনা-বাসনাৰ
সাতোৰঙী ফাকু ।
অজাতশত্ৰু হৈ স্বৰ্ণখচিত
পালেঙৰ মখমলীয়া উম লৈ
পত্নীৰ গৰ্ভত আঁকিলো উত্তৰসুৰীৰ
এখন হেঁপাহৰ কেনভাচ ।
অমৰ স্মৃতিসৌধত খোদিলোঁ
তথাকথিত মোৰ দুৰ্বাৰ পত্নীপ্ৰেমৰ
অক্ষয় ভৌতিক স্বাক্ষৰ ।
যিদিনা সপোন ভাঙিল
মোৰ সুখ সম্ভোগৰ সুউচ্চ পৰ্বত
তাচপাতৰ দৰে খহি পৰিল ।
দুৱাৰহীন এটি ক্ষুদ্ৰ কোঠৰীত
নিজকে আৱিষ্কাৰ কৰিলোঁ
আমৃত্যু বন্দীত্বৰ ৰূপত ।
বিয়লি বেলাত
অনুভৱৰ এছাটি মলয়াই
কাণে কাণে কৈ গ'ল-
'ভোগ সৰ্বস্বৰ ঔৰসত
মানুহৰ জন্ম নহয় ।'
এতিয়া মাথোঁ মই
আল্লাৰ সন্ধানত তিলতিলকৈ
মৃত্যুৰ বাবে অপেক্ষাৰত ।
মই মোগল সম্ৰাট ছাহজাহানে কৈছো
ভোগ সৰ্বস্ব জীৱন লৈ
তোমালোকে আৰু মোৰ দৰে
কোনো ঔৰংজেৱৰ
জন্ম নিদিবা, জন্ম নিদিবা ।
✍️সৌৰভ কুমাৰ বৰুৱা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ