ঘড়ীৰ উজাগৰী সংকেটোৱে যেতিয়া
মোৰ শৰীৰক জাগৰিত কৰাত ব্যস্ত হয় ,
তেতিয়া মনটোৱে বিচাৰে ,
সপোনৰ দিকচৌ বাটত
আকৌ এবাৰ ঘূৰি অহাটো ।
বাহিৰত মেঘাচন্ন আকাশ
সূৰ্যটোৱেও মুঠেই মন কৰা নাই ,
এজাক অকৃত্ৰিম নতুন কিৰণেৰে
দিগন্ত আৱৰিবলৈ।
চিপ্ চিপ্ বৰষুণ জাকৰ বাবেই
শৰীৰটোৱে অনুভৱ কৰিছিল
কোনোবা সুউচ্চ শৃংগ আৰোহণ কৰাৰ পিছত
লাভ কৰা পৰিশ্ৰান্তৰ l
ঘড়ীৰ উজাগৰী সংকেত , আৰু ,
নিদ্ৰাকুল মনৰ মাজত তুমুল সংঘৰ্ষ।
কুৰুক্ষেত্ৰ হৈ থিয় দিছিল
ভৱিষ্যৎ, চিন্তা, সপোন আৰু তাৰমাজত হতাশাই ।
নিদ্ৰাই হাৰ মানিছিল সময়ৰ চক্ৰান্তত।
গুচি গৈছিল বহু দূৰলৈ,
দিনটোলৈ পুনৰ নহাৰ প্ৰতিশ্ৰুতি দি ।
নিদ্ৰোত্থিত হৈ বাহিৰত বহি পৰিছিলোঁ ,
কিজানিবা এই সুন্দৰ পুৱাই অনুভৱ কৰায়ে
চিৰযুগমীয়া প্ৰেমৰ !
হঠাৎ দেখিছিলোঁ ,
এলাহৰ বান্ধোন ছিঙি ,
বৰষুণৰ মাজেৰে ৰাস্তা ফালি ,
ভঙা চাইকেল খন কোবাই কোবাই
উপস্থিত হোৱা হ'কাৰজন
কাকত খন গৰাকীক গতাই
গুচি গৈছিল গন্তব্য স্থানৰ দিশে।
ঠিক সেই ক্ষণতেই কাণত বাজি উঠিছিল ,
দুটি কাপৰ মিলনৰ ফলত
নিগৰি ওলোৱা
চিনাকি সুৰটো ।
হাতত তুলি লৈছিলোঁ ,
নতুন প্ৰভাতৰ প্ৰমাণ স্বৰূপ
"এপিয়লা চাহ " ll
✍️কিশোৰ কুমাৰ নাথ
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ