ৰৌদ্ৰ কামনা-ৰেখা বৰকটকী

আকাশক চিলাই নোসোধে
        কিমান দূৰলৈ উৰিব,
জোনাকক আন্ধাৰে 
    জানো সোধে,
  কিমান পোহৰ  আৰু বাকী?
        জীৱন এনেকৈয়ে
              বৈ আছে
বঢ়াই তৃষ্ণা ক্ষণে ক্ষণে...
      চিন্তাৰো  খহনীয়া আছে
         সত্যৰ অপমৃত্যুত  
              অসত্যই        
বাটে -পথে পিয়াপি দিয়ে।
      মানুহৰ চকুত দেখা 
           সজল বাৰিষাত
বৰ্ণময় কলিজাৰ গানে 
           সুৱাগুৰি তোলে  !
   স্পন্দিত হৃদয়ত   
         অতনু সুৰ বাজে,
             সময়েও গোপন   
                   বুজাবুজি জানে!
          সিঁচি দিয়ে আথে বেথে
      একোবাটি পলসুৱা আশা
               লহপহীয়া সুৰুজেও  
                  সেই কথা জানে...

✍️ৰেখা বৰকটকী,যোৰহাট

Post a Comment

Previous Post Next Post