হে কৰ'ণা তোমাক প্রণাম-সবিতা দাস

হে কৰ'ণা তোমাক প্রণাম
 তুমি সৰ্বশক্তিমান
তুমি সৰ্ব জগতত বিৰাজমান 
তোমাৰ ভয়ত মানৱ কম্পমান ।

হে কৰ'ণা তোমাক প্রণাম
ধনী-দুখীয়া তোমাৰ মনত সমান
ৰজা-প্রজাৰ তোমাৰ হৃদয়ত স্থান 
নাৰী-পুৰুষ সকলোকেই দিলা সন্মান ।

হে কৰ'ণা তোমাক প্রণাম
গাঁও-চহৰত চলাইছা মৃত্যুৰ অভিযান 
মৰাশৰে ভৰি পৰিছে শ্মাশান
অহংকাৰী -স্বাৰ্থলোভী ভয়ত ম্রিয়মান।

হে কৰ'ণা তোমাক প্রণাম 
তুমিয়েই শিকালা জীৱন মাথোঁ দুদিন
টকা-পইচা, দৰ্প- অহংকাৰ অৰ্থহীন 
মৰম-চেনেহ -সন্মান থাকে চিৰদিন ।

হে কৰ'ণা তোমাক প্রণাম
ঘৰে ঘৰে তোমাৰেই জয়গান
বিদেশৰ পো-বোৱাৰী স্ব-গৃহলৈ আগমন
আনন্দৰ অশ্রু নিগৰে থাউকতে পাই আপোনজন।

হে কৰ'ণা তোমাক প্রণাম
নাই লিংগ -জাতিভেদ ,এক জনগন
ভেকচিন চেণ্টাৰলৈ সকলোৰে গমন
 দীঘল শাৰীত ৰৈ আছে লৈ  বিষণ্ণ মন ।

হে কৰ'ণা তোমাক প্রণাম
নিজক চিনিবলৈ দিলা সন্ধান
গঢ়িব শিকালা একতাৰ বান্ধোন
হে কৰ'ণা তোমাক প্রণাম ।

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send