মাখি - প্ৰণৱ চক্ৰৱৰ্তী

 তোক দেখিলেই বুজি উঠো

ওচৰতে ক'ৰবাত আছে

গেলা-পচা বস্তু ,

তই ঘৰত সোমালেই

চিন্তা বাঢ়ে

কাৰণ তোৰ পৰশে

অশুদ্ধ কৰিব পাৰে

আমাৰ খাদ্য ৷

তোক মৃত্যুদণ্ড দিয়াৰ হেঁপাহ

এটাই তগবগাই উঠে মনত ,

কিন্তু তইও বৰ চতুৰ

বাৰে বাৰে আত্মৰক্ষাত

সফল তই ৷

কি যে বিড়ম্বনা

নিজক লুকুৱাবলৈ

তোক খেদাৰ বৃথা প্ৰয়াস আমাৰ ,

কিন্তু

গেলা-পচাবোৰৰ মাজত

থাকি থাকি তই হৈ পৰিছ

চতুৰ

বেইমান

স্বাৰ্থপৰ...

ঠিক গেলা-পচা চিন্তা

মগজুত কঢ়িয়াই লৈ ফুৰা

কিছুমান মানুহৰ দৰে ৷